2025 March-ah Aizawlah gas pipeline thlen tir tum

Tripura Panisagar atanga Aizawl thleng gas pipeline phum tum chu nakum March ah zawh hman tum a ni.
Gas pipeline siam phumtu tur Indradanush Gas Grid Limited hotute chuan an chief executive officer Ajit Kumar Thakur hoin Thawhtanni khan chief minister Lalduhoma a kawm a. Hydrocarbon Vision 2023 for NE India hnuaia hma an lak dan an sawifiah a. Panisagar atanga Aizawl gas pipeline thawh mek, cheng vaibelchhe 491 senna tur, kilometer 127-a thui hi 2025 March-a zawh hman tura tih a ni a. Forest clearance an nei fel a, hna hi thawk mekin chak tak leh tluang taka an thawh zel theih nan Mizoram sawrkar puihna an mamawh tih an thlen a ni.
Tuna gas pipe an phum mek hi kum 25 chhung vel chu Mizoram mamawh a phuhru thei turah an ngai a. Bur hmanga gas lak ai chuan a tlawm zawk hle tih an sawi.
Chief minister hian an hnathawh a hun taka an zawh theih nan sawrkar chuan a tulna apiangah puih a inhuam tih a hrilh a. Aizawla gas pipeline an phum thlen hnua mipui hnena a semdarh lehna tur ruahmanna pawh chak taka kalpui turin a lo hrilh.