2028-ah MNF tlinpui kum a thlen ka ring – Zoramthanga

2028-ah MNF tlinpui kum a thlen ka ring
– Zoramthanga
ZPM sawrkar chet dan hrang hrang avangin 2028 MLA inthlanah MNF tlinpui kum a thlen a ring tih MNF president Zoramthanga chuan a sawi.
Kum 2025 atana Thawhtannia an party office – Mizo Hnam Run hawnnaah MNF president chuan, inthlana an tlak avangin an lunghnur viau naa, tuna sawrkar chu kum khat chauh an la kal chungin an chuti an khati kan ti ta sup sup tih a sawi. “VC thlan hun pangngai chu August thla lam tur a ni a, chhan tha tak awm miah loin ZPM sawrkar martial law-in February-ah thlan tur tiin an pawh tawisak a. Hei hi a nihphung tur a nih loh avangin an minister-ten an insawifiah siak a. Chhuanlam tur pawh an sawi dik thei lo. VC Association lam High Court-ah an zualko ta a ni,” a ti.
Air Force kuta Lengpui airport pek an tum ngawt chu khawvela awm ngai lo a ni a. A tawp thlengin an do zel dawn tih a sawi. Buhfai man a letin vawilehkhatah an tito thut chu MNF chuan tha a ti loa, Hetiang chuan kum 2028-ah MNF tlinpui kum a thlen a ring tih sawiin, “Buhfai man kan ennawn ang. Petrol leh diesel pawh cheng hnih khat mai ni lo, cheng sariha an tito thut hi MNF chuan kan ngaihtuah tha leh dawn,” a ti.
SASCI chu an duh danin ZPM sawrkarin a kalpui a, MNF sawrkar hnathawh sa chhunzawm loin an insem a, utiization certificate an pek mumal theih loh avangin kum khata cheng vaibelchhe 500 vel hmuh thin kha, vbch. 250 an chan der tawh tih Zoramthanga hian a sawi. “Kumin hian Delhi khawngaihna an dawng lo a nih chuan an buai hle dawn a ni,” a ti.
Kawngpui chhe lutuk chu PWD engineer-te pawhin tun hi kawngpui chhiat ber tum a ni tih thu leh sawrkar kal tawhte hun lai aia a chhiat zawk thu an sawi niin MNF hruaitu hian a sawi. ZPM sawrkar financial management chu a ngaihna awm ngang lo tih sawiin, “A hmaa min demna zawng zawng kha tunah chuan an hmachhawn ve ta a. Hlawh tur an puk reng a, contractor bill an pe thei lo a. Khawiah pawh sum van thu bak sawi tur a awm lo,” a ti.
Inthlanah tlak chang a awm, a chhan pawh chi hrang hrang a awm tih a sawi. Pathianin MNF chu chhan neiin a din a, a ral a phal lo, a man tam tak an pe tih MNF president hian a sawi. “Inthlanah tla mah ila, a dawtah kan ding chhuak leh mai. Party tam tak an ral hnuah pawh MNF chu hotu an liam pawhin Pathianin a dang a dah zel. Min duat bik a, tawrh pawh kan tuar nasa bik. Inthlana tlakte hi vanpui chim anga ngaih tur a ni lo. A lehpeka kan thawhlehna tura kan chakna hmanrua a ni,” a ti.