38th National Games 2025:
Mizoram medal lak pakhatah a la ding!
January ni 30 atanga tan February ni 14 thleng awh tur 38th National Games 2025 kal mekah Mizoram chuan Wushu (under 56 kg huang) atanga bronze medal pakhat a sualchhuah ve tawh bak nimin tlai dar 5:30 pelh thleng khan medal dang lakbelh la nei loin, medal tally-ah 26-na a luah mek.
Kan hriat tawh angin, National Games kal laia Mizoram tana medal hmasaber leh awmchhun la ni reng hlawhchhuaktu hi Zemabawk East tlangval Nazareth Lalthazuala niin, Zuala hian pre-quarter a bye avangin quarter-final chu inkhel hah loin a lut phawt.
Last eight lamah hian a thlengtu Uttarakhand player tumin game a thunun hneh hle a, round hnih bak khelh ngai loin first round chu 4-2-in a la a, second round-ah 8-2 hnehna a chan zui leh avangin round thum khelh ngai loin a chak ta a ni.
Semi-final bout erawh a khirh ta deuh a, a tumpui Punjab player lakah 6-5-in a tlawm a, Mizoram tana medal awmchhun la ni rih hlu tak a hlawhchhuak ta tho a ni.
Pathianni khan boxing 57-60kg huang pre quarter-final bout-ah TC Lalremruati chuan a tumpui Nibedita Swain (Orissa) chu round hnihnaah RSC-in a hneh.
Mizo boxer hian round hmasaah pawh hneh takin a hma a hruai a, round hnihnaah referee chuan Orissa boxer hi khel zui chi nia a hriat loh avangin a titawp a, TC-i hi a chak ta a ni.
Pathianni vek boxing pre quarter-final lamah tho 54-57kg huanga khel Lalruatfela erawh a tumpui Manish Rathore (UP) lakah point-in a chak zo lo thung. Fela lakah hian Manish hi round tinah a chungnung zawkah a tang.
Dehradun lama khelh archery-ah Mizoram aiwahtute’n Pathianni khan Indian round qualifying an kap a, Isak Lalchuailova’n point 625 kap chhuakin 35-na a ni a, vanduaithlaktakin, round of 32 knockout stage a inhlangkai zo lo.
Mipa football lamah nimin vek khan dinhmun him lo taka ding Mizoramin semi-final lut tura chak ngei ngei ngai baka midang inkhela innghat chungin an pool match hnuhnungberah sithum faiin an group atanga knock out stage lut chiang tawh Assam an sawp a, he thu buatsaih lai hian Mizoram dinhmun hriltu tur Pool B league match danga Goa leh a thlengtu Uttarakhand inkhel result kan hre hman ta lo.
Goa leh Uttarakhand hi an inhnehtawk chuan point inangah Goa-in Mizoram an lo hneh avangin Goa zawk hian last four an lut tho dawn a, Uttarkhand an chak a nih erawh chuan Mizoramin khelh thuma point thum hum chungin semi-final an lut thei dawn a ni.
Niminah point 4 neia tlang tawh Assam lakah Mizoramin chak ngei tumin thapui an thawh a, K. Lalremmuana, Peter Lalrinhlua leh Lalengmawiate goal hmanga thenawm state hnehin Goa leh Uttarakhand inkhel an nghak ta phawt a ni.
He thu buatsaih lai thleng hian discipline 32-a medal inchuh infiammi 10,000 chuang pungkhawm zingah Services Sports Control Board chu hmahruaitu ni mekin, gold medal 17, silver pakua leh bronze pasarih nen belhkhawmin medal 33 an hui tawh a; an hnuai chiaha pahnihna luahtu Maharashtra chu medal belhkhawm (55)-ah sang zawk mah se gold medal lak tam lama an hniam zawk (15) avangin SSCB hnuaiah an awm.
State lian dang Karnataka chuan pathumna luahin, gold medal 15 tho nen medal belhkhawm 33 an la fel tawh.
An state buainain infiamna lama hmarchhak state ropui a pawthniam tho tura ngaih a nih laiin Manipur chuan table-ah palina an luah pha a; gold medal 11, silver pakua leh bronze panga nen belhkhawmin medal 25 an chhawlchhin leh bik tawh!
-- Advertisement --
Thlalak: Lukhum khum zawk hi National Games kal laia
Mizoram medalist awmchhun Nazareth Lalthazuala