Milan derby-ah chungnung zawk awm lo

Milan derby-ah chungnung zawk awm lo
Pathianni khan Giuseppe Meazza Stadium luahtu team pahnih AC Milan leh Inter Milan-in Serie A derby an khel a, home changtu zawk Milan pawhin home advantage an nihlawhpui zo bik lo a, hun pekbelhah an hmahruaina an hloh avangin Milan derby hi 1-1-in a tawp.
Sergio Conceicao team Milan lam hian chawlhlawk hma chiaha Tijjani Reijnders goal kha an chakpui hman teuh hle a, minute 90-ah pawh sikhat faiin hma an la hruai.
Derby della Madonnina lama Inter an lo hneh tawh bawk avangin tun season league-ah an elpui lian hi an hneh double thei mai dawnin a lang hman a, mahse, season kal laia tlawm harsat Internazionale-in beidawng duh loin goal an zawng zui tang tang a, hun pekbelh minute thumna a liam hma chiahin defender Stefan de Vrij chuan mikhual siphurh a sut a, chak zawk awm loa khelmual intawm team pahnih inthathenin, Inter Milan hi Serie A game 17 chhung an tlawm lo tling ta!
AC Milan hmahruaina goal kha mikhual keeper Yann Sommer-a’n Rafael Leao-a shot a danper hnua ball let nangfuh hmasaber Dutchman Reijnders tihluh a ni a; hun tawp dawna Inter beilet tan Nicola Zalewski chuan a awm hmangin ball a dawng thla a, defender de Vrij tan chhawpsakin, ani hian hnai set sawt atangin Inter siphurh sutna goal a khung zui ta a ni.
He result hmang hian Serie A table-a pahnihna luahtu Inter Milan chuan khelh khata la khel tlem zawk chungin hmahruaitu Napoli chu point thumin an pha lo a; AC Milan pawhin Inter khelh zat match 22 atanga point 35 hum chungin table-ah pariatna an luah chhunzawm a, point nga ngawtin Champions League khelh phakna hmun an pha lo.
Inter tan hian player pathum ngawtin goal ban an tihper a, chu’ng zinga pakhat Denzel Dumfries-a goal tur dang leh pawh AC Milan keeper Mike Maignan chuan pui takin a dansak bawk.
Manchester City captain hlui Kyle Walker chuan Pathianni game-ah khan a AC Milan debut nghakchhuakin, San Siro inkhel kha a hmunah England manager Thomas Tuchel chuan a thlir thlap bawk.
Juventus 4-1 Empoli
Pathianni Serie A inkhel dangah Allianz Stadium luahtute hian mikhual lakah zah an ngai lo khawp mai a; mipui 40,160 hmaah Juve tana goal hnih khungtu Randal Kolo Muani a langsar.
Lei thar Muani hian second half tir lam minute li lek chhungin mualneitu team siphurh sutna leh an hmahruaina goal ni zui ta a tilut hman a; an kawtkaia an point thum hnuchhuah hmangin Serie A table-ah top four an luah chho chiah chiah.
He inkhelah hian rin loh takin Empoli chuan tan atanga minute lina lekah defender Mattia De Sciglio goal hmangin hma an hruai a, Juve-in chawlhlawk hmain an siphurh pakhat lek pawh hi an sut zo lo!
Second half minute 61 an khel tling hlawt tihah France forward Muani chuan home team siphurh a sut er ta zawk a, chu mi atanga minute li a liam fel hmain Muani bawk hian Juventus hmahruailetna goal thawh zui lehin, a bak goal hnih hi chu hun tawp hnaih tawh lama substitute pahnih Dusan Vlahovic leh Francisco Conceicao-te tihluh a ni ve thung.
Juventus kha inelna hrang hranga an game khelh hnuhnung vawiriatah vawikhat chauh an chak zo a, hun harsa tak an tawh mek laiin chhanchhuaktu Muani a lo lang a, khelh 23-a point 40 hum chungin palina an luah chho a, nizan result tarlan hman lohah point khat leka an lehpelh Lazio-in Cagliari muala hnehna an chan chuan Juve hi top four pawn lamah an thehchhuak leh rih ang!
Pathianni game an khelh hma chiah khan Champions League-a an mikhual Benfica lakah sihnih faiin Juve an tlawm a, a hmalehin Serie A hmahruaitu Napoli lakah 2-1-in an chak lo bawk a, kha kha tun season league-a an tlawm vawikhatna leh game 21 chhung an tlawm loh zawn kal mek an tawpsanna a ni nghal bawk.
Kum 26-a upa Randal Kolo Muani kha Paris St Germain atanga thla hmasa maia an sengluh niin, tun kha a club thar tana a game hnihna niin, tun dinhmunah chuan lei fuh tih loh a har ang!
Juventus hian kartawp Zirtawpni zanah table-a 15-na luahtu Como an tlawh dawn a; point khat leka relegation zone chunga awm tawh 17-na Empoli-in Inrinni zanah AC Milan an mikhual thung ang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More