Hmun kilkhawr zawka cheng harsatna tawk ten, an hnaivai police station/out post phone number tarlana an biakpawh theih loh thu report an dawn fo avangin, Centre for Environment and Social Justice (CESJ) chuan, Mizoram puma police station 54 awm biak pawh tumin ni engemaw zah chhung an fiah hnuah, Police station 54 zinga pahnih chiah an be pawp thei tih an sawi a. Hei hi nimina press conference an neihnaah an sawi a ni.
Hei bakah hian, tun hnaia khawtlang duty ten misual nia an ngaih chunga an chet dan avangin, Mizoram mipui thinurna cho chhuak tualthihna a thleng tih CESJ chuan sawiin, dan kenkawh kawnga tlawmngai pawla sawrkar a innghat lutuk hian sawrkar chu dan kenkawh kawngah a fail a ni tih a lantir, an ti bawk.
Police station/out post phone number tarlan, biak pawh theih hauh loh hi thil serious tak a ni. Police-te pun ngaihna rikrum thil thlengah police te biak pawh theih an nih loh chuan, thil pawi nasa zawk a thleng zui thei tih kan hre tlang vek awm e. Tunhnaia Seventhday hospital-a thil duhawm lo tak thlengah te pawh khan, police inrawlh vat thei lo se, thil tha lo zawk a thleng thei tih a lang awm e.
CESJ ten Chief Secretary hnena an thlen ang hian, police biak pawh theihna phone number tarlan-te hi a chhia a nih pawhin, biak pawh theihna number thara thlak nghal ni se, chu chu social media lamah zau zawkin thehdarh nghal thei se a duhawm hle a ni. Sawrkar hnathawk tu te emaw kaisanna Notice copy pawh chak takin social media lamah a darh nghal uaih uaih thei thin a nih kha maw…
VDP chungchangah pawh hian, dan anga kaihhruaina anga kal thei tura intuaithar a ngai hle tih a lang a, chutianga hmalak nghalna chu tun thleng hian mipui lam hriat turin thawm engmah hriatzui a la ni lo niawm tak a ni. Sawrkar chuan, ‘kan VDP-te hi dan anga an duty hlenchhuak tura training an mamawh a nih hi’ tia VDP training thawm hi ri chuah chuah awm tak a nih laiin, chutiang thawm chu hriat tur a la awm chiah lo a nih hmel a, he lamah pawh hian sawrkar hian mipui hriat khawpin hma thar han la teh se.
Dan kengkawhtute inthlahdah…
Get real time updates directly on you device, subscribe now.
Prev Post