3R Centre-in hlut a hlawh

UD&PA department hnuaia Swachh Bharat Mission (Urban) 2.0 hmalaknaa din, bungraw hlui a thlawna lak theihna hmun – 3R Centre (Reduce, Reuse & Recycle) chuan mipui hlut a hlawh hle a; thla khat a tlin hmain bungraw hlui lut khawm atanga zaa 80 chuang a thlawna sem chhuah hman a ni.
3R Centre hi UD&PA building Thakthing Tlangah awmin kumin August 14 atanga kalpui tan a ni a. 3R Centre tum ber chu – khawpuia bawlhhlawh paih tihtlem; bungrua mamawh tawh loh bawlhhlawh bawma paih mai lova a mamawh zawkte hman theih tura chhawp chhuah leh, bungraw chhe tawh atanga thildang hmantlak tur siam chhuah a ni.
Tun dinhmunah reduce leh reuse kalpui niin, recycle pawh changtlung zawka kalpui tuma hma lak mek a ni.
3R Centre-ah hian bungraw hlui eng chi pawh pek theih a nih laiin, dawrkai thenkhat chuan an thawmhnaw zawrh lai pawh a hlawmin an donate thin niin Centre enkawltu chuan The Aizawl Post a hrilh a. 3R Centre hian sawrkar atangin fund dawn a nei lova, amah leh amah inenkawl thei tura tih a nih avangin, recycling kalpui theih a nih hunah suma chantir theih chi ngaihtuah a la ngaih tur thu a sawi.
Bungraw hlui hi mahnia 3R Centre-a dah thei lo tan pawh, NULM hnuaia self help group-ten Area Level Federation kaltlangin an khawn khawm thin a, chu chu department-in motor-in 3R Centre-ah a phurkhawm leh thin a ni.
3R Centre hi thingtlang khua hla tak tak atang pawhin an pan thin a, tuna hriat theih chinah, Aizawl khaw pawn atanga 3R Centre chhawr tangkaitu hi thingtlang khua 10 vel an awm tawh a. Inrinni leh sawrkar chawlhah khar a ni.