3rd round lut Swiatek leh Rybakina

3rd round lut Swiatek leh Rybakina
Defending champion Iga Swiatek chuan Ningani khan a tumpui American Claire Liu laka 6-4, 6-0 hnehna chang lehin third round a lut a, a tum thumna atana Suzanne Lenglen Cup lak ngei a tumna kawngah world number one hian Court Philippe Chatrier-ah harsatna lian tawk loin second round a paltlang leh phawt.
Nilainia kum 22 tling chho ve chiah Pole chuan thli thawt laia inkhelh chu a awlsam lo tih sawi chungin set hnihnaa a khelh thin dan level a pha chho leh hlimawm a tih thu a sawi a, “Dawhtheih hi a pawimawh ve thin, a bik takin clay leilungah,” a ti.
Swiatek hian round thumnaah Chinese Wang Xinyu a hmachhawn leh ang.
Third round lut zingah Kazakhstan fourth seed Elena Rybakina pawh telin, Ningani second round match pakhatah Czech tleirawl Linda Noskova chu 6-3, 6-3-in a hneh.
Wimbledon champion Rybakina pawh hian world number 50 Noskova lakah buaipui tham harsatna a tawk bik lo a; a hneh tak Czech tleirawl kum 18 mi pawh kha Paris clay-a mikhual tak ni bik loin, kum hnih kaltaa French Open junior title lo la ve ngat tawh a ni a, a tumpui lakah a ruh a la no deuh e tih mai a ni!
Kumin Australian Open final khel tawh Rybakina hi hmeichhe tennis-a ‘Big three’ thar an tih zingah telin, midang pahnihte chu French Open-a title a chuhpui mek pahnih – world number one Iga Swiatek leh second seed Aryna Sabalenka-te an ni.