Messi chhuah tur thu nemngheh a ni Khawi lam nge a pan leh tak ang?

Messi chhuah tur thu nemngheh a ni
Khawi lam nge a pan leh tak ang?
Season kal lai inelna hrang hranga goal 21 thuna assist vawi 20 nei tawh Lionel Messi chu Paris St Germain atangin a chhuak dawn tih nemngheh a ni ta a, Inrinnia Clermont an tum tur hi PSG tana a inlan tawpna a ni tawh dawn.
Kum 2021-a Barcelona chhuahsana Paris club zawm Ar-gentina forward chhuah tur thu hi Ningani khan Paris St Germain coach Christophe Galtier chuan sawichiangin, kum hnih daih contract a neih hmang zo tur hian khawi lam nge a pan leh dawn tak tih zawhnain ngaihven a hlawh zual sauh.
Kum 35 mi hian PSG a zawm hnuah kum 2021-22 leh 2022-23 season khan Ligue 1 title lain, July 2022-ah a club chu French Super Cup-ah a champion-pui bawk.
Football-a chawimawina leh lawmman awm thei zawng zawng hui kim vek tawhin, Argentina chu Qatar ramah khan World Cup title a lakpui a, Ballon d’Or award pasa-rih dawng thei awmchhun a ni.
Chutiang player ropui bikin a chhuahsan dawn tih Galtier chuan chanchinbumite hnena puang chungin, “Football history-a player tha ber ka enkawl ve thei hi ka tan hamthatna a ni a, Inrinni Parc des Princes game hi he team thuam inbel chunga a chetchhuah tawpna a ni ve tawh ang a, mipui atangin welcome tha ber a dawng ngei ang,” a ti.
PSG-a Messi hmalam hun hian sawi a hlawh kal mek a, tunhnaiah Argentina captain lamhnai tak pakhatin Reuters hnenah Saudi Arabian club Al-Hilal atanga sawmna felfai tak dawn a nih tawh thu a hrilh.
A naupan lai atanga a club vawn Barcelona nena sawizawm a nih bakah United States Major League Soccer club Inter Miami pawh sawirik zingah a tel.
Barca-ah hian a kir leh takzet dawn em tih chungchang hian ngaihven a hlawh zual niin a lang a; FC Barcelona fans lam chuan Camp Nou-a trinity of Lionel Messi, Xavi Hernandez and Andres Iniesta an tih mai kha hmuh leh an chak.
Xavi hi Catalan club-ah head coach a ni tawh a, tunhnaiah Iniesta pawhin Japan rama a hun tawp a hman thu hriat tur a awm a, Barcelona ropui vanglaia an player pawimawh pathumte kha Camp Nou-ah hian an inhmuhkhawm leh mai rinna a piang.
Thawhlehni khan FC Barca manager Xavi hi a team-mate hlui chungchangah a tawngchhuak zauh a, “Kan game khelh apiangin fans lamin Leo Messi hming an lam chhuak a, he boruak hi kei pawhin ka duh a, mahse, min ring teh u, kan kianga a lokir leh kirloh hi ka thuneihna piahlam a ni a, amaha innghat liau liau a ni.
“Ka sawi theih chu 99% hi Messi-a innghat a ni a, football thlirna atangin Leo liau liaua innghat a ni,” a ti.
Nilaini khan Argentine sports broadcaster Gaston Edul chuan twitter-ah Messi chuan eng club nen mah inremna a la siam lo tih sawi chungin ni reilote hnuah thutlukna a siam dawn tih a sawi a, a thlan tur chu ni se Barcelona a thlansak ang tih a tarlang tel.
Hetih lai hian BBC Sport column changtu pakhat Spaniard journalist rinkai Guillem Balague chuan Barcelona lama a kir a rin loh thu a lo tarlang ve mek bawk.