Arsenal an la beidawng lo

Pathianni zan khan English Premier League (EPL) 2022-23 khelh chhunzawm a ni a. Pahnihnaa awm mek Arsenal chuan an hnuai chiaha awm Newcastle United chu St James Park-ah luhkhungin, fiahna hautak an hmachhawn a. Inkhel hautak takah si hnih faiin an chak a, champion beiseina sang zawk an nei thar leh a, City lehpelh an tumnaah an la beidawng lo.
Captain cool Odegaard a pawr
St James Park-ah lenglut a, khel tha tluang tak Newcastle United hmachhawn hi Arsenal tan khelh hmabak pali an la neiha fiahna hautak ber tura ngaih a ni a. Champion beisei zui zel thei turin Gunners hian chak ngei ngei an mamawh. Inrinni zanah Manchester City an chak a, point li ngawta an chak tawh vangin Arsenal tan Newcastle hneh ngei ngei a ngaih phah a. St James Park-ah an chak zo lo a nih chuan City aia an khelh tam zawk bawk si vangin champion tuma inelna a tawp fel thawkhata ngaih a ni thei hial dawn. Inkhel pawimawh takah hian captain cool ruih Martin Odegaard goal thun leh Fabian Schär own goal hmangin hnehna an chang a, point thum hlu tak an hmu.
Arsenal hian inkhel pawimawh, boruak sang tak ni tel bawkah bul an tan tha a, pathumnaa awm mek Newcastle United lakah mit la takin an inlan. Thomas Partey aia lut Jorginho-a’n game a chawk nung tha viau a, Italian midfielder hian Arsenal game a khaikhawm tha hle. Mit la taka inlan Gunners hian goal an thun thuai a. Minute 13-na lekah Martin Øde-gaard chuan Jorginho siamsak tha tak chu lei hrulah a pet goal a, hmahruaina goal a thun.
Ødegaard goal thun hnu hian goal thun tumin an innawr tawn nasa viau a, boruak pawh a tan tha at at hle. Boruak sang tak hnuaiah hian Newcastle United in goal thun theihna hun tha tak an neih chu uiawm takin an hlah a, an si phurh an sut thei lo. Chawlhlawk dawn hnaiah Arsenal pawhin goal thun theihna hun tha zet mai an nei zui ve leh a. Captain Odegaard-a’n hun tha fahran mai a neih chu uiawm takin a hlah a, chawlhlawk hmain goal an thun belh thei bik lo.
Chawlhlawk hnu lamah mualneitu New-castle in an si phurh sut ngei tumin tan an khawh nasa lehzual a, an khing-puite an nawr nasa hle. Magpies hian fuh zetin an mikhualte an nawr tlang a, goal an thun ngei tura ngaih a nih laiin Joe Willock chu tha zetin block a nei a. Willock bloc tha tak vang hian si nghak Aaron Ramsdale tan hna hautak lutuk a awm loh phah hlauh. St James Park-a mipui khat hmurte chuan ring takin an team Newcastle an au phur a. Phur taka inlan Magpies hian uiawm takin an hun tha neih an hlah zel. Jacob Murphy chuan goal post a tih per a, penalty hmu hman zet tawh mahse VAR hmangin referee thutlukna sut a ni a, Gunners an him theih phah. Newcastle tan hian Alexander Isak pawhin goal post a tauh per leh bawk a, an muala an inlan hi an vanneih tum a ni lo chiang hle.
Vanneihthlak taka an him hram hram hnuin Arsenal tan vanneih lehzualna a thleng a, minute 71-naah vanneihthlak takin goal an thun belh. Minute 71-naah hian Arsenal hian fuh zetin an khingpuite an nawr let a. Gabriel Martinelli chuan thui tak ball a khalh hnuin tha takin box chhungah a la lut a. Goal a thawkchhuak. Martinelli ball cross hlauhawm tak hian si nghak Nick Pope a pel a, defender Fabian Schär chuan chiang zetin an lamah a pet goal a, Arsenal goal hnihna a thunsak. He goal luh hnu hian chak tuma inelna tawp fela ngaih a ni a. Newcastle United tan chak beiseina a awm tawh lo. Tichuan, goal dang luh belh lovin inkhel a tawp a. Arsenal chuan point thum hlu tak an hmu ta a ni.
St James Park-ah hnehna pawimawh tak chang Arsenal hian hmahruaitu Manchester City nen an inkar chu point thumin an tizim a, an inkarah point khat a la tla zep. Gunners hian City ai hian vawi khatin an khel tlem zawk a, hei hi an chance chhiat lehzual na a ni. Gunners hian Brighton, Wolves leh Nottingham Forrest te an hmachhawn zui leh dawn a, point kua hmu thei tura beisei an ni.
An tual zawlah ngei Arsenal hneh lovin tlawm bawk mahse Newcastle tan chanchin lawmaw a thleng zui tho thung a. An chak loh hnua khel Manchester United chu West Ham hneh lovin an tlawm. United in Hammers an hneh loh vangin Magpies hian pathumna an luah chhunzawm zel a. Champions League khelh phak beiseina sang zawk an neih thar theih phah.