76ers in semi-final an lut

Pathianni zing khan NBA play-off khelh chhunzawm a ni a. Philadelphia 76ers chuan vawi thum an hneh zawn tawh Brooklyn Nets an hneh nawn leh a, semi-final an lut. Inkhel dangah Phoenix Suns chuan a vawi thum nan LA Clippers an hneh a, semi-final an hnaih leh sawt bawk.
Semi-final lut tura tlawm thiang tawh lo Brooklyn Nets hian tum thum ngawt an hneh loh zawn tawh Philadelphia 76ers lakah bul an tan tha a, quarter hmasa berah point sarihin chungnung zawkah an tang tha. |ha taka bul tan Nets hi quarter hnihnaah an khel tha chhunzawm a, quarter hnihnaah point khatin an chungnung zui leh a, point 8 a hmahruai chungin chawlhlawk an hmang.
Point riat zetin hnufual tawh mah se chawlhlawk hnu lamah 76ers an khel tha ta viau thung a, point 8 in an khingpuite an lehthal ta hial. 76ers hi quarter hnihnaah point 11 zetin chungnung zawkah an tang a. Quarter hnuhnung berah point ngain chungnung zawkah an tang zui leh a. kum 1991 hnu lamah NBA play-off ah vawikhat nan 4-0 a hnehna an channa ni turin point 96-88 in hnehna a chang a, semi-final an lut ta a ni.
Play-off game lina an khelh tum hian 76ers player pawimawh Joel Embiid chu hliam vangin a inlan thei lo. An player pawimawh Embiid awm lo mah se Nets lakah an khel tha zui viau tho a, Tobias Harris chuan point 25 a thawhchhuah bakah ball sawhlet vawi 12 zet a dawng tling bawk. Philadelphia 76ers hian Eastern conference semi-final-ah Boston Celtic leh Atlanta Hawks te inkhela chak zawk zawk an hmachhawn zui leh ang.
Pathianni zinga play-off game lina inkhel dangah Phoenix Suns chuan point 112-100 in LA Clippers an hneh a, series ah 3-1 hmahruaiin semi-final an hnaih ta hle. Clippers an hneh nawn leh tum hian Suns player pawimawh Kevin Durant chuan point 31 tawkchhuakin, ball sawhlet vawi 11 a dawn tlin bakah assist vawi ruk a nei tling bawk. Suns tan hian Devin Booker pawh a khel tha viau a, point 30 a thawkchhuak.
Inkhel dangah LA Lakers chuan point 111-101 in Memphis Grizzlies an hneh a, series-ah 2-1 in hma an hruai a. Miami Heat pawhin 2-1 a hmahruai turin Milwaukee Bucks chu point 121-99 in an hneh ve bawk.