8th Schedule-a Mizo tawng dah tura hma lak tumnaah an lawm

8th Schedule-a Mizo tawng dah
tura hma lak tumnaah an lawm
8th Schedule-a Mizo tawng telh a nih theihna tura State Legislative Assembly-in hma lak a rel chu lawmawm an tih thu Central YMA chuan an sawi
Central YMA thuchhuak chuan, YMA hian India Danpui 8th Schedule-a Mizo tawng dah a nih theihna turin theihtawpin hma a lo la tawh thin tih sawiin, 1997 YMA General Conference-ah “Mizo tawng hi India Constitution 8th Schedule-ah telh a nih theihnan YMA-in hma lak ni rawh se” tiin a lo rel tawh a, heta tang hian India ram hruaitu lian – President, Vice President, Prime minister, Home minister adt. ah tum engemawzat lehkha thehluh a lo ni tawh a. Central YMA hruaitute tum hnih New Delhi-ah kalin Ministry of Home Affairs hotute hnenah thlen a lo ni tawh bawk tih a sawi.
‘YMA chuan Zofa hnam peng hrang hrang tawng hi humhalh a, tih hmasawn a tul zia hriain hma a la zel a. Chutihrualin, tuna kan hman mek Mizo tawng hi kan inbiakpawhna tawng tlanglawn ber a nih avangin inpumkhatna atan a pawimawh a, hma a sawn theihna tur leh a than zelna turin hma a la mek zel a. 8th Schedule-a Mizo tawng telh ve a nih theihna turin Central YMA chuan theihtawp a chhuah zel dawn a ni,’ a ti.