90m khawh tlin aiin Olympic gold a pawimawh zawk’ – Neeraj

90m khawh tlin aiin Olympic gold
a pawimawh zawk’ – Neeraj
Kumin Paris Olympic Games-a India gold medal beiseina lian pakhat javelin thrower Neeraj Chopra chuan Olympic leh world championship gold awrh tawh mah se a career-ah metre 90 a la khawh thleng ngai lo a, kum 2022 Stockholm Diamond League-a metre 89.94 a khawh tlin kha a mimala a khawh thui ber niin, metre 90 khawh tlin chu a tum lian leh a hmachhawp a nih laiin tunhnai mai khan a coach chuan Paris-a Olympic title dang sualchhuah leh chu metre 90 khawh tlin aia Chopra ngaihpawimawh zawk a nih thu a sawi.
Kum thum kalta Tokyo Games-ah khan metre 87.58 khawhin, kha kha athletics inelna bika India-in mimala Olympic gold medal la thei a neih awmchhun a ni.
Doha lama intihsiak hmachhawn tura cham mek kum 26 mi Chopra hi media lamin metre 90 khawh tlin a tum chungchang an zawt fo a, Arab ramah hian a coach Klaus Bartonietz chuan Reuters hnenah tun dinhmuna Neeraj Chopra ngaihpawimawh hmasakber hrilhin, “Metre 90 aiin medal a ngaipawimawh hmasa zawk rih. Khawh thui zawng chu kumtin tih theih deuh thaw a sang zel a, mahse, medal chu a ngai reng.
“Tokyo khawpuiah khan tumahin Neeraj kha a khawh thui zawng an zawt lo a, 87.58 kha a ni mai a, a tawk viau a ni. Metre 85 khawh lehin Olympic gold la leh dawn se a lungawi tho ang,” a ti.
Bartonietz hian infiammite tan Olympic-a mimal tihthatber hun tawnbuak a harsat thu leh a chhan a sawi nghal a, khawvel sport inelna sangberin a ken tel ‘pressure’ a len em avangin athlete tan he infiamna kutpui lian bera PB an tih mai ‘personal best’ tihchhuah a har tih a sawi.
Feikhawh bikah hian kum 1986-a a kalphung an siamthar hnu khan 90 metre-mark an tih mai, metre 90 khawh tling hi mi 24 awm tawhin, chu’ng mite chuan belhkhawmin tum 125 teh meuh metre 90 hi an khawh thleng pel tawh a, mahse, chu’ng zinga pathum chauh chu Olympic competition laia thleng a ni!
Bartonietz chuan sawizawmin, “Neeraj hian Paris-a a PB thar a tawngbua a nih chuan ka hlim hle ang a, metre 90 a la tling lo deuh a nih pawhin a tawk hle tho ang,” a ti.
Indian zinga Diamond League trophy hawn thei hmasaber Chopra hi inelna lian thamah a tang mar thei hle a, athletics inkhawmpui lian ber Olympic Games zawhah World Championship title la zui lehin, intihsiakna hrawl dang Diamond League-ah pawh a chhe tak tak ngai lo a, Paris khaw Olympic-ah pawh hian feikhawha khawvel mit fukna lian ber ni mekin, a coach Bartonietz pawhin Haryana thrower hian Paris-a thui mangkheng (magical mark) a khawh leh a nih pawhin mak a tih miah loh tur thu a sawi.
German coach chuan, “Metre 90 hi a hnaih tawh hle tih ka sawi ngam a; tunhnai kum engemawti chhung hian fei takin metre 87 atanga 88 inkar hi chhum lo chat loin a khawh thleng zar zar a, 90-metre club hi a zawm hnai tawh a nih pawhin a mak lo ang,” tiin metre 90 khawh tling rual 24 zinga a tel har a rin loh thu a sawi.
Chopra hian karliamta Zirtawpni khan Doha khawpuiah Diamond League meeting-a pahnihna ni chungin season bul a tan a, 88.38m khawhtu Jakub Vadlejch chu centimetre hnihin a pha lo.