Inrinni zan khan manager nghet nei lova awm mek Tottenham Hotspurs chuan an mikhual Crystal Palace chu si khat faiin an lo hneh. Manager lai lawk Ryan Mason hnuaia an chak hmasak ber tum hian Harry Kane chuan chakna goal thunin, Kane hian EPL-a goal thun tam lamah Wanyne Rooney a tlanpel a. Alan Shearer record khum tumin a umzui leh nghal ang.
Manager Antonio Conte an ban hnu a chak harsat a, talbuai ta tlat Tottenham hian an mualah Crystal Palace an mikhual. An mikhual lakah hian chawlhlawk dawn hnaih minute 45+1-ah Harry Kane chuan Porro siamsak atangin he inkhela goal awmchhun hi a thun a. Kane goal thun hmanga hnehna changin Spurs in point thum an hmu a. Brighton lehpelin paruknaah an inhlangkai. Spurs hian Europa League khelh phak tum viau mah se an hnuai chiaha awm Brighton ai hian vawi thum ngawtin an khel tam zawk a, an dinhmun a la him lo viau thung.
Crytal Palace laka goal khat thun Harry Kane khan English Premier League-ah goal 209 a thun tling chiah a. Manchester United forward ropui Wanyne Rooney goal thun zat a leh pel a, EPL-ah goal thun hnem ber dawttu a ni thar. Kane hian England tana Rooney goal thun zat a lo lehpel tawh bawk a. Rooney record thaichhetu langsar tak a ni.
EPL-ah hian goal thun hnem ber chu Blackburn Rovers leh Newcastle United forward ropui Alan Shearer a ni a. Shearer hian EPL-ah goal 260 a thun a. Harry Kane hian Shearer record khum turin goal 52 thun belh a la ma-mawh a. Team lian zawkah Kane hian a khel a nih phei chuan Shearer record hi khum thei ngei tura ngaih a ni.
Kane-a’n Rooney tlan pel
Get real time updates directly on you device, subscribe now.
Prev Post
Next Post