Pita Limjaroenrat an danglam bik nih tum hle

Pita Limjaroenrat chu Thai politician pangngai ang a ni lo. Thailand-ah cabinet minister kum chawhrual chu 65 a ni thin a, kum upa te zah em emna a nihna ramah kum 42 mi chauh niin a kum aiin a la lang naupang zui a, a ‘confi’ em em mai chu a danglamna a ni bawk.
Confi viau tur a nihna pawh a awm a, a party reformist Move Forward te chuan inthlanah chakna changin kum 78 chhunga Thailand in prime minister a neih naupang ber a ni dawn a, modern era thutchilh burtu conservative te a barakhaih chiang hle a ni.
Coalition sorkar siam turin inbiakna neih mek a ni a, party lian ber pahnihna kum 2001 atanga Thailand inthlana chakna la chang ziah tu Pheu Thai te nen sorkar siam rin a ni.
Pheu Thai leh Move Forward te hian progressive an inti ve ve a, politics-a Thailand military te inrawlh rengna chu an duh lo ve ve bawk.
Mahse, Move Forward kaihhruaitu Pita chuan party upa zawk Pheu Thai te chu a tlankhalh a, an candidate tam tak hnehin social media campaign an kalpuina hmangin political leadership dang daih an zuar bawk.
“Ka danglam alawm,” tiin Pita chuan a sawi a, “Coalition sorkar siam rum rum kan tum lo va, prime minister nih thuai thuai lam ka tum a ni lo. Sorkar chu mipui tan a ni zawk a, khawvel a inthlak tawh,” tiin a sawi a.
“Mi chak nih a, ropui viau nih a ngai lo, mipui ten min ngaihthlak theih nan ka awm reng a ngai zawk,” a ti a.
“Eng hunah pawh famkim renga ka lan a ngai hek lo. Thailand a mihring pangngai ve mai, motorcycle khalh thin, kawtthlera midangte ang bawka thil ei ve thin ka ni mai,” a ti bawk.
Pita Limjaroenrat hi Thai family hausa tak atanga piang a ni a. New Zealand a school kal niin United States-ah postgraduate a zir a, a hnuah an chhungkaw sumdawnna rice-bran business enkawlin chumi hnuah ride-hailing company Grab a enkawl leh bawk.
Hruaitu inngaitlawm em em New Zealand prime minister hlui Jacinda Ardern te leh Uruguay president hlui Jose “Pepe” Mujica te ngaisangtu a ni.
Move Forward te chuan Thailand electoral history-a reform agenda ambitious ber an nei bawk a. Policy 300 chuang an manifesto-a an ziahah LGBTQ Thais te tana inneih remtih te, sipaia tan tihmakmawh tihtawp te, business monopoly tihtawp te, education system siam thata 21st Century economy mila her rem te a tel.
Hei mai bakah hian military-drafted constitution chu hnawl tum bawkin army sumdawnna tam ber te chu Ministry of Finance hnuaia dah luh an tum bawk a.
“Military coup a khat tawka thleng reng hi tihtawp a hun tawh a, military coup thlen phahna eirukna politics a hluar tak tihtawp a ngai a ni,” tiin Pita chuan a sawi.
Move Forward tena kalpui tura an intiam leh rawtna turu ber zawk chu ‘ lèse majesté law’ siam that a ni a, he dan hmang hian royal family sawisel hlektute chu lung ina khung theih niin chu chu siam danglama monarchy leh Thai mipui te inlaichinna chu sawiho theiha dah an tum a ni.
He an hmalak tumna tak hi senator 250 lai a hmaa military government-in a ruattte leh prime minister thar tur thlannaa vote nei bawk site chuan Move Forward te dan an tumna chhan a nih thu an sawi chiang nghal thung.
“Hun a inthlak angin rilru puthmang pawh a inthlak tawh” tiin Pita chuan a sawi a, “Tunah chuan monarchy chungchang sawi turin kan puitling tawh a, dawhtheihna kan nei tawk tawhin ka hria. Consertative tin te chuan 21st century a constitutional monarchy tihtur an hrethiam tawh a ni,” tiin a sawi bawk.
“Mipui maktaduai 14 te thlawpna avangin kan chak a. Chiang takin he agenda hi kaltlangpui kan duhzia leh langtlang tak a nihzia pawh an hrechiang a ni,” tiin a sawi bawk.
Move Forward te chuan coalition an nih angin tunah lower house a seat 500-ah seat 312 an nei mek a, super-majority nei turin senator 64 chauh an mamawh thlawpna an hmuh an inbeisei a ni.
Move Forward tena harsatna an tawh ber tur chu lèse majesté law hi ni mah se, senator thenkhat kum khat chauh hun nei tawhte chuan coaltion te kalh zawnga vote thlak an hreh ang an ti bawk.
Heng mai bakah hian Pita Limjaroenrat chuan foreign policy thar kalpui a tum bawk a. Military sorkar hnuaiah Prime Minister Prayuth Chan-ocha chuan foreign policy a ngaihsak lo hle tia sawi a ni a.
“Tunah chuan international community te nena kan inkungkaihna tha zawk siam a ngai a ni,” tiin Pita chuan a sawi a. “A inbutkawka kan kalpui a ngai a. Kan tawng chhuah tam a ngai a, rules-based world order kan thlawp a ngai a ni,” a ti bawk a.
“Kan harsatna tam ber te economic a ni emaw air pollution a ni emaw, fertiliser man a ni emaw khawvel dang nena inzawm vek a ni,” tiin a sawi bawk.
A sorkar chu Asean (Association of Southeast Asian Nations) thenawm ram te nen inhnaih zawkin an thawk ang a, Myanmar civil war tihtawp a nih theih nan te Thai-Myanmar boder a humanitarian aid a luh tam theih nan te a thawk ang a ti bawk.
Pita chuan chinfel tur tam tak a nei thung a, a hmasa berin party lian ber pahnihna Pheu Thai te nena inremna siam a ngai a. Pheu Thai te hian ministry a dinhmun lawkte an hauh bur bawk a, chu mai bakah thiltithei em em parliamentary speaker dinhmun an ngiat tlat bawk a, mahse hei hi chu Pita party tena bill an chhawpchhuaha kalpui zel nana an mamawh bur nia an ngaih a ni bawk si a ni.