Moscow-in Kyiv sipai 250 tihlum inti

Russia defence ministry chuan Ukrainian ten nasa taka chetlakna an neih thu sawiin Ukrainian sipai 250 chuang an tihhlumsak tiin a sawi a.
Kyiv-in engmah sawi a la nei lo va, Russia thusawi pawh independent a finfiahna a awm thei rih hek lo.
Russia defence ministry chuan Donetsk region-ah Ukraine chuan chet a la thut a, hetah hian tank batallion pahnih lai a hmang tiin a sawi a.
Russia thusawi hi Ukraine-in Russian sipai tena a ram an chhuhsak tawh laklet a tumna a ni em tih pawh a la chiang thei chuang lo.
“4 June zing lam khan hmelma te chuan South Donetsk region lamah nasa takin thapui thawhin chet an la a ni” tiin Russian defence ministry chuan Telegram kaltlangin a sawi a.
Ministry thuchhuah chuan Ukrainians te chuan Russian defence tih pherha paltlang tumin chet an la tia sawiin, “Hmelmate hian an tum an hlen thei lo va, an hlawhchham a ni,” a ti zui bawk.
Video an tihchhuah zuiah vansang atanga military vehicle beih lai te tihchhuah niin Moscow chuan Ukraine chuan sipai 250 vel leh tank 16 an hloh tiin a sawi.
Ukraine hian a thlaa thla Russian te nawrlet turin ruahmanna a a siam tawh a, chumi tur chuan a sipaite training pein leh khawthlang ramte ralthuam pekte chu a nghak a ni.
Hetih lai hian Kyiv officials te chuan thapui thawh an tumnaah engmah sawi neih an tum loh thu sawiin ruahmanna sawi lawk chu hmelma te puihna mai mai an ti a. “Ngawih kan chuh a, beihpui thlak hunah sawi a ni chauh ang” tiin Ukraine defence ministry chuan Pathianni khan Telegram kaltlangin a puang ve thung.
Ukraine indonaah hian boruak tang tak awm mekin Kyiv chuan Ukraine mipui te leh khawthlang ram amah thlawp tute lakah Russian lines te chu su kaw theiin a ram chan tawh te a la let leh thei tih a lantir a ngai tia sawi a ni a.
Hetih lai hian hmun dangah Moscow dodal fighters te chuan Ukraine nena inrina Russia ram chhunga Belgorod ah Russian sipai thenkhat an man thu an sawi a. Heng Moscow dodaltute hi Liberty of Russia Legion (FRL) leh Russian Volunteer Corps (RDK) te an ni.
Heng group pahnih te hi President Vladimir Putin paihthlak duhtute an ni a, Ukraine run duh lo bur tute an ni bawk.
Belgorod top official Vyacheslav Gladkov chuan an sipai man te chu an la dam a nih chuan hmuh a duh thu a sawi a. Mahse, fighters te chuan governor chuan ‘huaisenna a nei lo’ tia sawiin Russian sipai an man te chu Ukraine hnenah an hlawn dawn an ti bawk.