Manipur-ah Meitei leh Kuki-Zomi te inbeihna chu la thleng rengin hetih lai hian State sorkar chuan Meitei te chu Scheduled Tribes status pek tur an ni nge ni lo tihah engmah rawtna a la nei lo niin Thawhlehnia Imphal-a Manipur High Court Division Bench hmaah sawi a la nei lo.
Division Bench of Justices Ahanthem Bimol Singh leh A. Guneshwar Sharma te chuan Thawhlehni khan March 27-a High Court single bench-in thupek siama Manipur State sorkar chu ST list-a Meitei te dah an nih theih nana hma la tura a tih chungchang a ngaihtuah a.
Kuki-Zomi leh Naga mipuite chuan Manipur State-ah he High Court single bench thupek hi duh lovin April 19 khan thupek mipui hriata puanchhuah a nih veleh lungawilohna an lantir zui nghal a, May 3 khan Manipur-ah ‘Tribal Solidarity March’ nei zuiin hei hi buaina chhuahna bul ni zuiin a kaihhnawih vawiin ni thlengin mi 100 chuangin nunna an chan phah tawh a, mi sang tamin chenna In an chhuahsan phah tawh bawk.
Single Bench High Court thutlukna hi All Manipur Tribal Union te chuan March 27-a thupek hi Division Bench ah an khing let a ni.
Union Tribal Affairs Ministry aiawhin Deputy Solicitor general of India pawhin court hnenah appeal siamah engmah dodalna siam an tum loh thu a sawi bawk a.
Hetih lai hian State sorkar aiawha ding advocate chuan court ah thu theh luh an neih hmain hun an mamawh thu a sawi a. State sorkar atangin appeal-ah objection an siam dawn leh dawn lohah thu an lak phawt a ngai a ti bawk a. Appeal hi thla khat chuang kal ta khan file a ni tawh thung.
Hei bakah hian Meitei Tribes Union te, respondents anga ngaihte pawhin hun an mamawh thu an sawi bawk a. MTU te hi a tira Manipur High Court hnena kala ST list a dah an nih theih nana hma la hmasatu an ni a.
“Thawhtanniah appeal siama objection kan neih te kan theh lut ve ang” tiin advocate Ajoy Pebam, MTU aiawh chuan a sawi a.
All Manipur Tribals Union aiawh hian senior counsel Colin Gonsalves leh a team te inlan thungin High Court chuan June 15 ah ngaihtuah leh turin a ti ta thung a ni.
-- Advertisement --
Amit Shah hnenah
Manipur a Meitei civil society group te chuan Kuki ‘terrorists’ tena an beihzui zel avangin Meitei thalai te chuan an ralthamte an tung ngam lo tiin Union Home Minister Amit Shah hnenah an thlen.
Home Minister Amit Shah hnena Coordinating Committee on Manipur Integrity (COCOMI) tena thu thlen an neihah Kuki extremist te chuan Imphal Valley leh a chehhvela Meitei te chu an bei nasa tiin an sawi a. COCOMI hi Meitei pawl an ni.
Ngenna an thlenah Amit Shah an inremna a awm theih nana ngenna a siam chuan awmzia a nei tlem hle an ti bawk a. Home Minister in Kuki extremist te insum tura a kar chungin Kuki hel pawl te chuan suspensions of operations (SoS) chu an bawhchhe char char tho tiin an thlen bawk a.
Suspension of Operation hian Kuki-Zomi group hnuaia extremist group 25 chuangte a huam mek a.
COCOMI te chuan Assam Rifles te leh security personnel dah te chuan hma an la tha lo tiin hei vang hian Meitei mipuiteah thinrimna a siam a, Centre a rinna an nghah a tinep bawk an ti bawk a. Amit Shah chu ‘a tawp nan’ Manipur mipuite tan ‘Kuki terrorists te lakah an phutawk chhan letna’ pe turin kan ngen che an ti bawk.
Kuki extremist te laka hmalakna hlawhchhama a awm a nih chuan meitei community te chuan lohtheihlohin ‘kan thingtlang khuaa pawisawi lote chhan turin lungawilohna leh hmalakna thar kan nei ang’ tiin an sawi bawk a.
“Tualchhung thalai ten an ralthuam neih te an tun duh lohna chhan chu Kuki firfiak tena an beihna nasa zawka an kalpui vang a ni” tiin COCOMI te chuan an sawi bawk a. June 1 atang khan Kuki hel pawl te chuan Meitei khua te an la bitum char char an ti bawk.
May 3-a buaina chhuah atang khan Imphal Valley hmun hrang hranga police te hmun atangin silai 4,000 chuang leh a mu nuai 2 chuang ruk chhuahin a awm tawh a. Heng zinga 20% vel chauh chu hmuh let a la ni.
Manipur buaina avang hian nunna chan an tam tawhin hliam pawh an tam tawh hle a, a ni telin harsatna a nasa tial tiala ngaih a ni bawk a. Chu mai bakah remna siam a la hla hlea ngaih a ni bawk.