Northeast state 3 inthlan hun tur
Northeastern state pathum – Tripura, Nagaland leh Meghalaya te inthlan hun tur chu Election Commission chuan January 19-ah a puang dawn.
Chief Election Commissioner (CEC) Rajiv Kumar kaihhruai senior official te chuan January 11 atanga 14 inkar chhung khan state pathum te hi an tlawh a. Chungah chuan political party, central security leh civil official te abik takin district level official te nen inkawmhona an nei a ni.
“Delhi-ah EC meeting a awm zui ang a, Ningani hian northeastern state pathuma inthlan hun tur puan hman tum a ni,” tiin official te chuan an sawi.
Kum nga awh Nagaland, Meghalaya leh Tripura assembly chu March 12, March 15 leh March 22 ah a tawp dawn a, he mi hma ngei hian assembly thar a pian hman a ngai a ni.
ECI thupek angin leh confidence building measure kalpuiin Central Armed Police Force (CAPF) leh state security force te chu district officials te kaihhruaina hnuaiah hmun sensitive deuhah te chuan flag march an nei lawksa tawh a ni.
Inthlan hun tur puan hmain political party te pawh an inpuahchah nasa hle tawh a, inthlan huna an strategy kalpui tur te an duang tawh hlawm bawk a.
BJP te chuan New Delhi-a neih mek National Executive meeting neihnaah kum Assembly leh 2024 parliament election atana an party strategy an duang nghal ang.
Hetih lai hian TIPRA Supremo leh Tripura royal scion Pradyot Bikram Manikya Deb Barman chuan rally a neihnaah inthlan awm turah an demand te an thlawp dawn tih an tihchian loh chuan tu party mah thawhpui neih an tum loh thu a sawi a. TIPRA te hian Tripura Tribal Areas Autonomous District Council (TTAADC) area chu Article 2 leh 3 hnuaiah ‘Greater Tipraland State’ a hlankai an ngiat a. “Tripura a indigenous mite damkhawchhuah nan tihmakmawh a ni” tiin Deb Barman chuan a sawi.
TIPRA te hi tunah member 30 awmna Tripura Tribal Areas Autonomous District Council (TTAADC) a rorelna lekkawh mek niin, TTAADC huam chhungah hian Tripura hmun thuma thena hmuh hnih lai 10,491 square km a awm a, mihring 12,16,000 an awm bawk a, heng zinga 84 per cent hi tribal an nih avangin an thlek lam tling mai tura ngaih a ni.