Tu hun nge ni

Footballer ropui bik pahnih; Lionel Messi leh Cristiano Ronaldo te hun a liam ve tan ta a, kum 2024-ah chuan an ni pahnih hi football-a chawimawina sang Ballon d’Or dawng thei tur zingah an tel a rinam tawh lo. Messi leh Ronaldo awm loh hunah tu hun nge thleng ang tih chu football chik mite titi tui a tling der tawh.
Player la naupang zingah thiamna ril nei tha tak tak an awm a, chung zingah chuan Erling Braut Haaland, Kylian Mbappe, Neymar, Vinicius Junior leh Jude Bellingham te an langsar viau. Club leh ram tan player che tha fal tak an awm thar thut a nih loh chuan heng kan tarlan player panga zinga pakhat tal hi chuan Ballon d’Or an dawn a rinawm.
Inelna lian pathum; Champions League, Premier League leh FA Cup-a Manchester City champion puitu Erling Haaland hi kum 2023-ah pawh hian Ballon d’Or dawng tura rinkai zual zingah a tel a. Inelna ropui ber FIFA World Cup-ah Argentina a champion pui miau vangin Haaland hian Messi a nekchhuah zawh a rinawm rih lo a, kum 2023-ah bik hi chuan Messi hian chawimawina sang a dawn leh a rinawm hle.
Ballon d’Or dawng ngun ber Lionel Messi chuan PSG chhuahsanin Major League Soccer club Inter Miami a zawm a. Europe-ah a inlan tawh dawn loh vangin kumin bak chu atan Ballon d’Or dawn a harsa tura ngaih a ni. Messi ang bawkin Ballon d’Or vawi nga ngawt dawng tawhtu Cristiano Ronaldo chu Europe pawn, Asia khawmualah daih a khel tawh a. A kum a lo tam ve tawh bawk nen atan Ballon d’Or dawn belh harsa viau tawh tura ngaih a ni bawk.
Sahuai chu Sahuai bawkin a thlak a, Ar nghal pawh Ar nghal bawkin a thlak leh mai thin. Footballer ropui bik pahnih Lionel Messi leh Cristiano Ronaldo te inlan rualin, mawi takin par an chhuang dun a. Tunah chuan an par a lo chuai tan ta. An hnungah hian tu hun nge her chhuak ve ta ang le?