Insta-a zuitu ngah ber Ronaldo

Football-ah record hrang hrang lo siam tawhtu Cristiano Ronaldo chuan record dang siam a nei leh ta a. Social Media site lar Instagram-ah Followers ngah ber a ni thar a, Kylie Jenner leh Lionel Messi te chungah a awm.
Football a chawimawina ngaihhlut hlawh ber Ballon d’Or vawi nga ngawt dawng tawh Ronaldo hian Istagramm-ah followers 597 million zet a nei. Kum 2019 khan Istagramm-ah zuitu ngah lamah pathumna a ni a. 2023 July thla a nih meuh chuan followers ngah ber a ni thei der tawh.
Ronaldo hian Istagramm-ah brand post a neih apiangin £1.87m a hlawh ang zela chhut a ni. Saudi Arabia club Al-Nassr in kum khatah £177m ($228m) zet hlawh an pe mek bawk a. Sumdawnna lian tak a kalpui bawk nen kil hrang hrang atangin Ronaldo hian sum a hai lut chur chur a ni ber mai.
Ronaldo hnuai chiahah hian zuitu 397m zet nei Kylie Jenner a awm a. American nu lar Kylie Jenner hian brand post a neih apiangin £1.47m zet a hlawh zel anga chhut a ni ve thung.
Footballer ropui ber, Ballon d’Or vawi sarih ngawt dawng tawh Lionel Messi chu Istagram-a zuitu ngah lamah pathumna a ni a ni a. Inter Miami player thar Messi hian brand post a neih apiangin £1.38m zel a hlawh anga chhut a ni ve thung. Messi hnung chiahah hian zaithiam Selena Gomez a zawm ve thung a. He zaithiam chhe lo zet hian instagram-ah brand post a neih apiangin £1.35m hlawh anga chhut a ni ve thung a. Panganaah lemchan thiam leh Wrestler lar Dwayne ‘The Rock’ Johnson a awm a. Ani hian post pakhatah £1.33m zel hlawh ang a ni.