Australia leh England an tlang ve leh

August 7, Thawhtanni khan FIFA Women’s World Cup last 16 khelh chhunzawm a ni a. A thlengtu Australia leh champion tura rinkai zinga mi England ten hnehna changin quarter-final a lut ve leh.
Inelna thlengtu Australia hian Stadium Australia-ah Denmark an hmachhawn a, si hnih faiin hnehna an chang.
An muala inkhel hmachhawn an nih vangin Austrlia hian chak ngei tumin an mikhualte an nawr a, an ram mipui tawiawmna an dawng tha bawk a, an khel tha viau bawk. Darkar chanve an khelh tlin hma chiah minute 29-naah Caitlin Foord chuan hmahruaina goal a thun a, he goal hmang hian si khat faia hmahruai chungin chawlhlawk an hmang.
Chawlhlawk hnu lamah Denmark game kang hret mah se an si phurh sut tur khawpin hun tha an insiam thei lo. Goal thun an mamawh em em laiin goal an chhuah leh ta zawk a, minute 70-naah Hayley Raso chuan Australia goal hnihna a thun a, an hmahruaina a tizau. Goal hnih an thun hnuin goal dang a luh belh thei tawh lova, 2-1 a Denmark hnehtu Australia hian quarter-final an lut zui ta a ni.
Thawhtan ni vek khan champion tura rinkai England chuan Brisbane Stadium, Brisbane, Australia-ah Nigeria an hmachhawn a, penalty shootout-ah hnehna chang hramin quarter-final an lut ve bawk. He inkhelah hian England player pawimawh Lauren James chu minute 87-naah hnawhchhuah a ni.