The Band co-founder Robbie a thi

The Band co-founder Robbie a thi
Hranfhlui guitarist, hlaphuahthiam leh lemchan thiam, The Band dintute zing ami ni bawk Robbie Robertson chu natna hrang hrang avanga rei tak a inenkawl hnuah kum 80 mi niin August ni 9 khan a thi. Robbie hian a nupui Janet leh a fate pathum a kalsan a ni.
Toronto, Ontario a puang, Robbie Robertson hian kum 10 mi a nihin guitar a perh tan tawh a, kum 16 a tlin chuan Ronnie Hawkins backing band Hawks chu drummer Levon Helm nen an zawm a, Hawks hian Bob Dylan-a tour hriathlawh tak Going Electric tour, 1965 leh 1966-ah te an play pui ve zak zak tawh a, chumi hnuah an group hming thlakin ‘The Band’ an inti ta a ni. An album hmasa ber Music From Big Pink chu 1968-ah an tlangzarh a, hemi kumah Woodstock Festival-ah pawh an inlan nghe nghe a ni.
An band hla hit hmasa pali ‘The Weight,’ ‘Up on Cripple Creek,’ ‘Time ti Kill’ leh ‘Rag Mama Rag’ te pawh ama phuah niin, Joan Baez hla hit ‘The Night They Drove Old Dixie Down’ pawh kha 1971-a a phuah a ni. Kum riat hnuah an band an thiat a, farewell concert pui tak ‘The Last Waltz’ an nei a, he concert-ah hian Bylan, Eric Clapton, Muddy Waters, Van Morrison, Neil Young leh Joni Mitchell ten an perform pui a, The Last Waltz concert film pawh Martin Scorsese-a’n direct-in a hunlaiin an hit hle a, ‘The Last Waltz’ soundtrack album pawh 1978-ah tlangzarhin Billboard 200 chart-ah No.16 a kai pha a ni.
Lemchan khawvelah pawh film hrang hrang tan music siamin a thawh hlawk hle a, Gary Busey leh Jodie Foster channa ‘Carny’ (1979) film bakah, Scorsese film ‘Raging Bull’ (1980), King of Comedy (1983) leh The Color of Money (1986) bakah American Beauty (2006), Shutter Island (2009), The Wolf of Wall Street (2013) leh Silence (2016)-ah te pawh a thiam thil a lo thawh tawh bawk.
1987-a ama hming chawiin a solo debut album a tichhuak a, Grammy-ah nominate niin, a solo album hnuhnung ber chu 2019-a a tihchhuah ‘Sinematic’ tih kha a ni ta a ni.
The Band hi 1994 khan Rock and Roll Hall of Fame-ah lakluh an ni tawh a, 1989-ah Canadian Music Hall of Fame-ah lakluh an ni tawh bawk a, 2008 khan Recording Academy atangin lifetime achievement award an dawng tawh bawk.