A tana insenso i hreh loh chuan i hmangaih tihna a ni

Ngaihzawng te present pek chungchangah kan phak ang tawka kan thilpek manto dan a zirin kan hmangaih leh hmangaih loh a hriat theih niin mithiam ten an sawi tlat mai. Kan hmangaih zawng te chu thil manto pek kan hreh lo a, chutihlaiin kan hmangaih dan nêp deuh te thilpek atan chuan a man tlawm deuh zawk kan zawng thin niin an sawi.
Present atana kan neih ang leh phak tawk atanga chhut a thil manto tham deuh kan pek hian a kan peka chu kan hmangaih hle a ni tih a lantir. Kan tana an pawimawh zia lantir nan chuan kan phak tawka a tha ber pek kan duh a, thil mantlawm zawn kha rilru-ah dik lo riaua hriatna a awm tlat thin a, chuvangin a mantlawm aiin a manto zawk chu kan hmangaih tih entir nan kan lei ta zawk thin.
University of Colorado Boulder a mithiam Peter McGraw leh a ho ten zirchianna neiin, “Miin thilpek atana a thil lei dan hian a thilpek dawngtu tur chu a hmangaih leh hmangaih loh a lantir thin a ni. Hmangaihna tak tak chuan sum ren lam kan rilruah a lang pha tawh ngai lo,” a ti.