ZMC leh NEIGRIHMS thawh dun theih dan tur dap

North East Indira Gandhi Regional Institute of Health & Medical Science (NEIGRIHMS) Shillong chu Inrinni khan Health & Family Welfare minister Dr R Lalthangliana’n a tlawh a. NEIGRIHMS director Prof. (Dr.) Nalin Mehta, medical superintendent Prof. (Dr.) C Daniala leh thawktu dangte nen an inkawm.
Health minister chuan Zoram Medical College-a Cardiology Department bul tan theih dan sawipuiin, hemi atana cheng nuai 100 hmuh a nih thu a sawi a. He department doctor, nurse leh technician te tan a thlawna training tih sak tura a ngenna chu NEIGRIHMS director hian a theih anga hma a lo lak tur thu a hrilh. ZMC-a department hrang hrang tihchangtlun leh tihphuisuina’n NEIGRIHMS thiamna, a bikin training tawi ang chi an mamawh thu sawiin, hemi kawnga thawhdun theih dan dapsak tura a ngenna chu NEIGRIHMS hotute hian a theih anga thawhho dan an dap tur thu an sawi.
Mizoramin a neih loh critical care specialities – neurology, nephrology damlote NEIGRIHMS-a inentir tura kalte chu inenkawlna tha an dawn thin avang leh doctor-ten an lo ngaihsak avangin lawmthu a hrilh a. Chutih rualin Mizoram atanga NEIGRIHMS pan damlo tam zawk chu mi harsa tak tak an nih thin avangin ngaihsak lehzual turin a ngen a ni.
Inrinni tlai vek khan Dr R Lalthangliana hian Shillongah Hmarchhak YMCA chairman a nihna angin Hmarchhak YMCA Regional Committee thutkhawmah a tel a. YMCA chu hmarchhaka pawl pawimawh tak a ni, tiin, hmarchhak Kristiante inpumkhatna atan a thawhhlawk hle tih a sawi a ni.
Guwahati-a AYUSH Review meeting an neih hnu ah Mizoram minister hian Assam chief minister Himata Biswa Sharma nen inkawmin kum hmasa lama YMCA North East Region tan Guwahati-a Multipurpose Centre sakna atan ram pe tura a ngenna chu sawichhuak lehin, Assam CM chuan hemi atan ram pek a tiam a ni.