OSD to Chief Minister-in banna thehlut

OSD to Chief Minister Rosangzuala’n Nilaini khan chief minister Zoramthanga hnenah banna a thehlut a, ram leh party tana tha zawk tura a ngaih avang leh chhungkaw tana hun hman a mamawh avangtea ban dil a nih thu a lehkha thehluhah hian a ziak.

“Ka unaute pathum hi an boral tawh a, an fate ka enkawl a ngai a, chhungkaw tana hun pek a ngai a,” tiin Rosangzuala chuan The Aizawl Post a hrilh a, “Kan party tan leh ram tan, sorkar tan a that zawk ka ring a,” a ti.
Nikum lamah chief minister hnenah hian tawngkain vawi hnih a lo dil tawh a, mahse a remti lo niin a sawi a, Thawhtanni khan chief minister hi hmuin ban hi a dil leh a, chumi hnuah Nilaini khan ziakin a thlen ta tih a sawi.
A hna a thawh chhungin social media lamah beih a tawh nasat thu a sawi a, “Social media-ah min troll nasa a, hrehawm tih chang ka nei,” a ti a, “Kan chief minister hi mi tha, mi zaidam, mi rilru tha a ni a, social media-a min troll vang hian amah pawh a hmingchhiat phah thei a, hei hi tha ka ti lo. Social media-a min troll vang hian keimah chauh ni lovin party leh chief minister an hmingchhiat phah thei a ni,” a ti.

Social media-a an beihnaah kuhva tawlhah puh a nih thu a sawi a, “Kuhva smuggling ti-ah te min puh a, a awmang lo lutuk,” a ti.

“Kuhva smuggling chu a zep theih loh a, thenawm khawvengin an hria. Kei hian ti ila miin an hria ang,” a ti a, kuhva tawlh chungchang hi chief minister leh party pawhin an hmingchhiat phah a hlauh thu a sawi.

Rosangzuala hian September ni 14, 2021 khan OSD hna hi a chelh tan a, thla khatah cheng khat a hlawh a ni. OSD to Chief Minister a nihna bakah Adviser to the President, MNF a nihna atanga ban a dilna a ziak bawk.