Marren Morris-i’n country music chawlhsan dawn

Country star Marren Morris chuan hla thar pahnih leh music video tihchhuakin, country music kalsan a tum thu a puang a, tunnaiah country music industry-ah neuh neuh a tam niin a sawi a, chuvangin he genre hi kalsan law law mai a tum ta niin a sawi.
Los Angeles Times-in an kawmnaah Maren chuan, “Tunlaia country music chhunga chanchin leng kual vel hi, ka theih tawpin pumpelh ka tum a. Kan inhlat ta hle niin ka hria. Ka tawlh hnun a ngai ta a ni. Country music hi ka thanlen pui a, ka hlaphuah te hi a Nashville kalphung thin hle a ni. Mahse, tunah chuan a hralhna lam ringawt ngaihtuah lo va rimawi tha tak tak phuah chhuak tura insawrbing hi a tul ta zawkin ka hria. Kan inkarah neuh neuh a tam a, chhuahsan mai ka thlang ta a ni,” a ti.
Hmanni lawkah Jason Aldean hla ‘Try That In A Small Town’ music video chuan inhnialna a chawk chhuak a, he video hian tharum thawhna leh chi inthliarna a chawi lar niin an sawisel a, mahse, hetiang sawiselna karah hian fans lamain Billboard Hot 100-a No.1 ni thei turin an vawrh kang ta tho a ni.
Maren chuan, “A tawpkhawkah an tang a ni. Midang runluih nan an stream lui a ni. Rimawi hmangaihna vang a ni tawh lo,” a ti a, tuna a music video thar ‘The Tree’ pawh hi Jason Aldean hla a sawiselna lam rawngkai niin a lang a, Aldean-a music video hi a chhuah tirah pawh a Maren Morris hi a sawiseltu langsar zingah a tel a, nikum kham Aldean leh a nupui Brittany Aldean te nen pawh hian gender identity-ah an thu inhmu loin, an lo inchhang sil ve nual tawh bawk a ni.