Youth Services minister hoin Aizawlah NSS Day

National Service Scheme (NSS) Day vawi 54-na chu Zirtawpni khan hman a ni. NSS Day hi September 24 a ni a, kuminah Pathiannia a tlak avangin September 22-a hman a ni.
Aizawla hmanpuitu Youth Services minister Robert Romawia Royte chuan zirlai leh thalai, an thatlai leh vanglai huna NSS volunteer nih vanga programme officer (PO) te kaihhruaina hnuaia inhmang mekte chuan thil tha an ti tih a sawi a. PO te pawh ram leh hnam tana rohlu chherchhuaktu an nihna a thara hre turin a fuih.
NSS Day hmannaah hian volunteer-ten a thlawna thisen pekah hmahruaitu an nih zel theih nan Youth Services Minister’s Trophy for Voluntary Blood Donation chu college pathum – Pachhunga University College, Govt Hrangbana College leh Govt Aizawl College hnenah leh, higher secondary school pathum – Synod HSS, Govt Zemabawk HSS leh Helen Lowry HSS hnenah hlan a ni.
NSS volunteer-te hian a thlawna thisen pekah hma an hruai thin a. Kum 2020 leh 2021-a Covid len vanga zirna in khar a nih laiin thisen pekah pawh tlahniamin pahnihna dinhmun an hauh a; kum 2018 leh 2019-ah chuan a thlawna thisen pe hnem ber niin, kum 2022-ah phei unit 6093 pe in, a pe tam ber an ni.
NSS Day hi Mizoram puma NSS dinna institution hrang hrangah anmahni institution leh vantlang hmun tifai leh a thlawna thisen pe in hun hman a ni. Tunah hian Mizoram pumah NSS Unit awmna school leh college 101 a awm a ni.