Afghan mi thawn hawte lungawi lo

Afghanistan mi Pakistan rama raltlan anga lut document nei lote thawn hawnna hun tura ruat ni chu thleng tawhin Pakistan chuan Afghan refugee te thawn haw hna chu a tan ta a, hemi duh lo hian Afghan refugee te chu inhmu khawmin Islamabad-a United Nations Human Commission for Refugees (UNHCR) office kawtah an pungkhawm a ni. Thla chanve kal ta atang khan Pakistan-a rorelna chelh lailawktu chuan Afghanistan atanga danlo a lo lut mi maktaduaih 1.7 te chu November ni 1 hmaa Pakistan chhuahsan turin a lo ti tawh a. Heng dan loa lo lutte hnen ah hian hriattir lawkna lo pe tawhin hun tiam chhunga chhuak duh lote chu mana thawn haw luih an nih tho tur thu a lo hrilh tawh a ni. Thawhtanni kal ta khan he thawn kir duh loh lantirna hi neih niin defence lawyers te, journalist te, human rights activists leh mimal Taliban laka him lo tur te an ni a, kum hnih kal ta atang khan UNHCR hian kan dinhmun hi ngun takin a zir chiang lo tiin Khaama chanchinbu mite chuan an report a ni. Lungawilohna lantirtute chuan Afghan mi Pakistana pem lutte chu Pakistan Embassy, Kabul-in visa a pe lo hrim hrim a, UNHCR pawhin Pakistan thuneitute lak atanga kan him theihna turin lehkha pawimawh ziakin min pe phal lo hrim hrim tiin an tanchhan ve bawk a ni.
Pakistan atanga thawn haw turte lungngaihna ber chu Pakistan chhuahsana thawn kir an nih chuan Taliban lamin human rights bawhchhia ah an lo puh leh dawn a, heng Afghan raltlan te hian dinhmun harsa takah an awm leh dawn tih an inhriat vang a ni. Heng bakah hian, Khaama chanchinbu mite sawi danin Afghan hmeichhia te lawyers chuan lungawilohna lantir a nih hian UNHCR-in engmah hmalakna a nei lo tiin an puh ve bawk a ni. Hmanni lawka Pakistan Interior Minister Sarfaraz Bugti chuan sorkar chuan raltlante inthawn haw hun atana ruat pawh sei a tum thu ruahmanna a awm lo tiin a sawi a, “Dan loa awmte hnawhchhuah an nih tur thu kan sawi a, mahse he thu sawi a nih dan chuan Afghan chauh te hnawhchhuah kan nih chuan tiin Khaama Press chuan a report a ni. Pakistan sorkar thu thawn/chhuahah chuan Afghan chauh te ni loin dan loa Pakistan-a pem lut zawng zawngte a huam a ni,” tiin Sarfaraz Bugti chuan a sawi a ni. Ram hrang hrang atangin dan loa lutte an rama thawn kir leh a tum chungchangah Pakistan sorkar chuan a thutlukna te ngaihtuah tha leh tura nawrna a dawng nasa em em chungin Pakistan chuan thutlukna siam fel tawhin an thutlukna a sut duh chuang lo a ni, tiin Pakistan-a chanchinbu pakhat Tribune chuan a sawi a ni.