Nuai 918 senna hall sa zo

Cheng nuai 918 senga sak Thenzawl Auditorium chu Thawhlehni khan Tourism minister Robert Romawia Royte chuan a hawng.

Minister chuan he hall sakna tura bul tantu, bialtu MLA hmasa Pu Lal Thanhawla chungah lawmthu a sawi a. Chief minister Pu Zoramthanga’n sawrkar hmasate bul lo tan tawh hmasawnna hna tha chu an chhunzawm zel tur thu a lo sawi tawh tihhlawhtlinna pakhat a ni, tiin, “Golf course pawh a ni a, heng lo pawh hi thil dang tam tak kan chhunzawmin kan tihlawhtling a ni,” a ti.
Auditorium sakna hi chi hniha sanction a ni. A building pui ber hi 2015 March khan cheng nuai 499.99 a sak tan a ni a; a building leh tualzawl, building chhung electric zam, tuizem leh thildangte thawh a ni a; contractor chu Zothankhuma, Zotlang Aizawl a ni.

Hemi hnu hian hman theiha peih turin a thawhbelhna (additional estimate) atan Mizoram sawrkarin nuai 417.56 a sanction leh a, chu chuan a building chhehvel leh a chhung thuamthatna hrang hrang; a hungna, a cheina, light leh sound system, chowkidar quarters leh store room leh tul dangte thawh a ni. Heng atana architectural design, structural design leh a taka thawh zawng zawng hi Mizoram PWD in a kengkawh a ni. Contractors hi hna chi hrang hrang thawktu mi paruk an awm a ni.

Hall sakna atana sum sen tawh chu nuai 918 vel a ni. Heng bakah hian rawng hnawih leh a chhuat siamna, tui connection ah Tourism department chuan nuai 1.5 vel an seng a, 125 kVA generator dah tura hma lak mek a ni. Auditorium Hall pui berah hian mi 758 thut theihna tur thutthleng hun a ni.