Tun hnaiah Opium man leh nual

Ruihhlo hlauhawm opium-in Mizo thalaite a
la tibuai lovah ngaih a ni a, mahse man tur
hi chu a awm leh zauh thin. Tun hnaiah pawh man tur a awm a, a awm nual a nih hmel.
Mizoram Excise & Narcotics (MEN) department-in kuminah October thla thleng khan opium hi gram 367 an man a, October thla chhungin an man nual. July thleng khan gram 301 an man a, August leh September tea an man loh hnuah October-ah an man leh nual.
2020 leh 2021-ahte khan opium hi an man lo a, nikumah an man leh. Nikum khan an man na a, a man tam lo; gram 0.015 an man. Nikumah tlem azawng an man a, kuminah an man belh leh ta zel a ni.
MEN department chhinchhiahna enin, 1995 khan opium an man hmasak ber kum a ni a, kg 0.480 an man. Mahse opium hi a hluar zui lo a, man pawh an man zui lo vang vang. 2001-ah an man leh a, hetah hi chuan kg a tling tawh – kg 4.809 an man. A kum leh 2002-ah pawh an man leh a, kg 0.480 an man.
An man tam ber kum chu 2016 kha a ni a, hemi kum hian kg 18.478 lai an man. 2016-ah hian a hlawmin tam tham tak an man a, hmun hrang hrangah man lovin vawi khatah a neitu pakhat kuta mi an man lawih avangin, kum khat chhunga man zat pawh a sang ta a ni. 2016 tih lohvah chuan 2001 kha an man tam kum a ni a, 2007 (kg 4.035) te, 2012 (kg 2.653) te, 2011 (kg 2.500) te kha an man tam kum a ni.
MEN department hian 1995 atangin kum tina ruihhlo an man zat an chhinchhiah a, opium an man loh kum hi a tam zawk. 2016-ah tih loh chuan tam thama vawi khata man pawh an nei lo. Opium hi Mizoramah a la hluar lovah ngaih a ni a, Mizorama an mante pawh hi hmun danga mi tur a lo ni deuh zel tih thu dawn a ni.