Jung Kook sipai-ah inziak lut dawn

Jung Kook chu South Korean sipai-a lut turin a inpuahchah ta a, ARMY tan open letter tichhuakin, “December thlaah chuan ka zin kawng thar ka zawh tan dawn a, sipai-a tang turin ka kalsan rih dawn che u a ni. He chanchinthar ka share che u hian hrehawm tihna ka neih rualin a kawng lehlamah chuan ARMY te nena kan hun hman ho tawh hlu tak tak te min hriatchhuah tir a, chu chuan min tihlim riau thung. Kan hun hman ho zawng zawng kha ka nuna hun >ng ber an ni. ARMY te nui thawn, min support-na leh hmangaihna te chu he hun min hruai thlengtu hi a ni. Ka suangtuah ram min tawmpui a, ka kianga inawm zel avangin ka lawm tak zet e,” a ti.
BTS enkawltu Big Hit chuan BTS member RM, Jimin, V leh Jung Kook ten sipaia inziak lut turin thil tul ang ang an buaipui mek thu an puang a, “Kan fan-te hnenah hei hi hriattir kan duh a, RM, Jimin, V leh Jung Kook te chuan sipai tang turin thil tul an buaipui ta. Heng artist-te hian an sipai duty te tihpuitlin vek an tum a ni. Chanchin kan inhriattir zel dawn nia,” an ti bawk.
Jung Kook hi anni pali zinga a sipai luh hun tur puang hmasa ber a ni ta a, “Ka sipai tan chhungin min lo nghak ula. Kum khat leh a chanve chu hun rei ve tak mai a ni a, chuvangin mahni hmasial lutuk a thil sawi erawh a tih chi bik lo. Stage-ah puitling zawkin ka rawn inlan leh ang tih erawh ka intiam a, ARMY ten nun nuam leh hlimawm tak in neih ka duhsak che u. ARMY ten nitin nun hrisel leh duhawma inhman ka beisei. Kan intawn leh theih hun tur leh thil thar kan sawiho theih hun tur nghak chungin ka ngai dawn hle mai che u. Hriselin dam takin lo awm rawh u. Ka hmangaih che u,” a ti bawk.
South Korea-ah hian mipa pangngai te chu kum 28 an tlin hmaa thla 18 tak sipai-a tang vek tura tih an ni a, BTS atangin Jin, J-Hope leh Suga te chu sipaiah an inziak lut tawh a, an vaia an sipai nunchan zir hun an zawh fel a, BTS anga an rawn kir leh theih hun tur chu 2025 ngah a ngai dawn ta a ni.