Aston Villa in City an lehpel

December 6, Nilai zan khan English Premier League 2023-24 khelh chhunzawm a ni a. Aston Villa chuan Villa Park-a an mikhual Manchester City chu si khat faiin an hneh. Champion lai hnehtu Villa hian City lehpelin pathumnaah an inhlangkai. Inkhel dangah Fulham chuan an mikhual Nottingham Forest chu si nga faiin an sawp.
Season kal mekah beisei phak baka khel tha, top 4 huang luah phak ta hial Aston Villa hian Villa Park-a an mikhual Manchester City lakah an khel tha viau a, chak phu zawk an ni chiang hle. Unai Emery naute hi champion lai lakah champion phuin an inlan a, goal khat aia tam an thun loh vangin an vanduai niin a sawi theih hial zawk. An mualah hnehna hlu tak an chan theih nan World Cup-a Argentina champion puitu Emiliano Martínez a thawhhlawk leh viau bawk.
Villa park ah pathumna nih inchuha inkhel Villa leh City te hi goal thun tumin an inawr tawn nasa hle a, inkhel hmuhnawm tak an lantir. City in goal thun theihna hun tha an nei hmasa a, Erling Haaland pet hlauhawm tak chu si nghak Emiliano Martínez chuan tha zetin a dansak a, an team a chhan him. Haaland hian chawlhlawk hmain hun tha a nei nawn leh. A pet hlauhawm tak chu Martinez-a’n a dan leh bakah a tauh hlauhawm tak chu Martinez hian a dansak nawn leh bawk a, hun tha vawi thum ngawt a hlah zawn.
Goal an chhuah teuh viau laiin Villa an awm mai mai bik lova, goal hlauhawm an nei ve reng bawk. Leon Bailey chuan goal thun theihna hun tha a nei a, a pet tha tak chu si nghak Ederson-a’n a dang hman hlauh. Hemi hnu hian defender Pau Torres chuan goal a thun teuh viau a, Aderson a paltlang zo bik lo. Inkhel hmuhnawm tak hi goal lut awm lovin hun chanve hman zawh a ni phawt.
Chawlhlawk hnu lamah inkhel a hmuhnawm chhunzawm a, goal hmuh tur a awm ta bawk. Mualneitu Aston Villa in fuh zeta an nawr tlang hnuin Leon Bailey chuan inringtawk zetin a khalh kual phawt a, pet goal ngei tuma a shot chuan City defender Ruben Dias a per a, si nghak Ederson tan dan rual lohin goal kilah a thlawt lut a, minute 74-naah hmahruaina goal a thun.
An mualah goal thun hmasa zawk an nih vangin Villa an phur hle. Goal an chhuah vangin City in goal thun ngei an mamawh a, goal thun tur khawpin an khingpuite an nawr tlang thei chuang lo thung. Villa zawkin goal an thun belh teuh thei hle. EPL club lian dangte pawhin an ngaihven Douglas Luiz chuan goal a thun teuh hle, a pet tha tak chuan si nghak Ederson khum tawh mah se goal post a per hlauh a, uiawm takin a goal lo hlauh. An mikhualte nawr betin, hlauhawm zawk ni reng mah se Villa hian goal dang an thun belh thei lo. Goal dang thun belh thei lo mah se champion lai lakah hnehna hlutak an chang ta tho thung.
Champion lai Manchetser City laka chak Aston Villa hi an mualah an khel tha zawn hle a, Villa Park-a EPL an hmachhawn hnu-hnung vawi 14 zet hnehna an chang zawn hial tawh. City laka an chak vangin Villa hian khel 15 atangin point 32 an hmu a, Manchester City lehpelin pathumnaah an inhlangkai. Tottenham nen an inhnehtawk hnuin City an khel tha lo chhunzawm a, Aston Villa lakah an tlawm leh tak vangin hmahruaitu Arsenal nen point ruk ngawtin an inthlau tawh a, palinaah an tlahniam hial tawh.
Fulham an chak nuamsa
Thawhleh zana inkhel dangah Fulham chuan an mikhual Nottingham Forrest chu si nga fai ngawtin an sawp a, 12-naah an inhlangkai.
Fulham hian Craven Cottage-a an mikhual Nottingham Forrest lakah an khel tha viau a, chawlhlawk hmain goal hnih an thun hman. Minute 30-naah Alex Iwobi chuan hmahruaina goal a thun a, minute 34-na lekah Raul Jiminez chuan an goal hnihna a thun zui leh nghal zat a, si hnih faia hmahruai chungin chawlhlawk an hmang.
Chawlhlawk hnu lamah Fulham an khel tha leh zual a, minute 54-naah Jiminez chuan an goal thumna a thun a. Minute 73-naa Iwobi goal a luh hnuin minute 86-naah Tom Cairney chuan an goal ngana a thun zui leh bawk. An muala point thum an hmuh vangin Fulham hian pen hnihin hma lam an pan a. Nottingham Forrest erawh chu table hnuai lamah an awm zui zel thung. Forrest hian an manager an ban dawn hnai nia sawi a awm zui nghal bawk.