City in Luton an lehthal, Chelsea an tlawm

Pathianni zan khan English Premier League khelh chhunzawm a ni a, champion lai Manchester City chuan 18-naa awm mek Luton Town an lehthal thei hram a, harsa takin hnehna an chang. City an chak laiin Chelsea an talbuai chhunzawm a, si hnih faiin Everton an hneh lo. Inkhel dangah Tottenham leh Fulham in hnehna an chang ve bawk.
City in Luton an hneh hram
Aston Villa laka an tlawm hnuin champion lai Manchester City chuan 18-naa awm mek Luton Town chu Kenilworth Road-ah an hmachhawn a. Chawlhlawk hmaa si an phurh zet hnuin, chawlhlawk hnu lamah goal hnih an thun a, harsa takin hnehna an chang thei hram.
Tlahniam thei dinhmuna ding mek Luton Town hian beisei phak bakin an mualah an khel tha a, an duh angin City an tal thei bik lo. City hian goal thun theihna hun tha nei hmasa mah se an hun tha an hloh zawn. |um hnih ngawt an him zawn hnuin chawlh lawk dawn hnaihah Luton hian fuh zetin an nawr tlang. Minute 45+1-ah Elijah Adebayo chuan Andros Townsend cross tha zet chu hnaite atangin a tauh goal a, hmahruaina goal a thun. Adebayo goal thun hmang hian si khat faia hmahruai chungin chawlhlawk an hmang.
Chawlhlawk hnu lamah City in an si phurh sut ngei tumin tan an khawh a, goal inhnaihchilh takin goal hnih a thun. Minute 62-naah Pep Guardiola team te hian duh zetin an khingpuite an nawr tlang a, penalty hmu tura an inngaih hman aiin Bernardo Silva chuan chiang zetin a pet goal a, an si phurh a sut. An si phurh an sut hnuin City an khel tha zui viau a, goal an thun zui leh thuai. Minute 65-naah Jack Grealish chuan Julian Alvarez cross chu leihrulah a pet goal a, hma an hruai letna goal a thun. Grealish goal thun hnu hian goal dang a luh belh thei tawh lo va, City chuan 2-1 in hnehna an chang zui ta a ni.
Luton Town laka chak hram City hian palina an luah chhunzawm a, hmahruaitu Liverpool chu point liin an phak lo mek. Hetihlai hian Luton Town hian khelh 16 atanga point 9 chiah la hmuin, 18-na an luah chhunzawm ve thung.
Chelsea an tlawm leh tawh
Point 10 zet an paihsak vanga hnual hman tak Everton an khel tha tluang a, vawi thum an chak zawnna ni tura team lian Chelsea an hneh leh tak vangin an puja a fuh a, Toffees hi an phur leh viau tawh. Everton hian Goodison Park-a an mikhual Chelsea chu si hnih faiin an lo hneh a, relegation zone an hlat deuh deuh zel.
Goodison Park-ah Everton leh Chelsea an inhneh tawk viau a, goal pawh an thun lawk thei lo. Chawlhlawk hnu lamah an hun tha an hloh hnuin minute 54-naah Toffees hian goal an thun ta nge nge. Fuh taka an nawr tlang a, Chelsea si nghak Sanchez an paltlang zawh loh hnuin ball per let chu Abdoulaye Doucouré chuan chiang zetin a pet goal a, hmahruaina goal a thun.
Sum tam tak seng chunga khel tha tak tak thei lo, tunhnaia tlawm fo Chelsea in an si phurh sut tum viau mah se danglamna an thlentir thei lova, hun tawp dawn hnaihah goal an chhuah belh leh ta hial zawk. Minute 90+2 ah buai deuh nuaih nuaih kar atangin Lewis Dobbin chuan kawh zetin a pet goal a, an chakna a nem nghet. Tichuan, goal dang luh belh lovin inkhel a tawp a, Chelsea chu Everton lakah si hnih faiin an tlawm leh ta a ni.
17-naa awm mek Everton lakah an tlawm leh tak vangin Chelsea hi 12-naah an tlahniam a, an dinhmun a chhe zual zel. Season kal mekah an che chhe em em chunga an manager Pochettino lakah dawhtheihna nei a, an la nghak reng thei hian mak tih a hlawh hle tawh. Hetihlai hian point 10 zet an paihsak vanga table hnuai bera awm hman Everton erawh an insiamtha chak viau a. 17-naah la awm chhunzawm mah se, point 4 in relegation zone an chhuah san fel tawh thung.
Spurs an insiam tha
EPL 2023-24 a bul tan tha ber, tlawm nei lova kal tluang rei ber ni hman Tottenham Hotspurs chu tun-hnaiah an khel chhia a, tlawm an hrat bakah chak an harsat. An dinhmun hniam lai ni bawk mah se Pathianni zana an mikhual Newcastle United chu 4-1 laiin an hneh a, kawng dik lam zawhin ke an pen leh tan.
An hmahruaina hloh fel a, pangana daiha tlahniam tawh Spurs hian an mikhual Newcastle lakah an khel tha viau a, a khat mawi tawkin goal an thun. Destiny Udogie chuan minute 26-naah hmahruaina goal a thun. Hmahruaina goal an thun hnu hian goal a thun theih loh vanga sawisel hlawh a, thlasik bazarah chhuak tur anga sawi Richarlison chuan minute 38-naah an goal hnihna a thun a. Brazil forward hian minute 60-naah an goal hnihna a thun leh bawk. Si thum faia hma an hruai hnuin minute 85-naah penalty an hmu zui leh a. He penalty hi captain Son Heung-Min chuan pet goal in an hmahruaina a ti zau. Si li fai ngawta hnufual tawh Newcastle tan hian minute 90+1-ah Joelinton chuan an mualpho lutuk tur thup mawi nan goal a thun ve hram.
Newcastle United lakah awlsam taka hnehna chang Tottenham hian top 4 huang an hnaih thar leh a. Newcastle United erawh chuan AFC Bournmouth lakah si thum fai ngawta tlawm Manchester United lehpel a, paruknaa inhlankai an tumna an puitlin zo lo thung a, pasarihnaah an awm chhunzawm.
Pathianni zana inkhel dangah Fulham chuan Craven Cottage-a an mikhual West Ham United chu si nga fai ngawtin an sawp a, hnehna lian an sualchhuak ve bawk.
Fulham tan hian Raúl Jiménez chuan minute 22-naah hmahruaina goal a thun a. Chawlhlawk hmain Willian leh Tosin Adarabioyo ten goal an thun belh leh bawk. Chawlhlawk hnu lamah Harry Wilson leh Carlos Vinícius ten goal khat ve ve an thun bawk.