Brenda Lee “Rockin’ Around the Christmas Tree’ a la Hot ber
Brenda Lee Krismas hla hlui “Rockin’ Around the Christmas Tree” chu Billboard Hot 100 (singles) chart-ah a No.1 a, he chart-a kar hnih a No.1-na a ni ta. He hla hi 1965-a tlangzarh daih tawh kha niin, kuminah chart No.1 a kai chauh a, Brenda Lee hla he chart-a No.1 kai thei pathumna niin, 1960 hnua he chart-a a hla No.1 kai leh thei hmasa ber a ni bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Brenda Lee hi December ni 11 khan kum 79 a tling chiah a, tuna a hla No.1 ni ta hi a record lai chuan tleirawl kum 13 mi chauh a la ni a, Hot 100 chart-a No.1 ni thei upa ber a ni.
He hla hian kar khat chhungin stream maktaduai 41.3 leh sales 6,000 a la nei thei a, radio airplay pawh ngaithlatu maktaduai 20.5 a nei thei a, hei hi chart-ah a kar hnih nan a No.1 pui leh ta a ni.
Krismas hla dang Mariah Carey ‘All I Want for Christmas Is You’-in stream maktaduai 38.5, sales 5,000 neiin, radio-ah ngaithlatu maktaduai 24.1 a nei bawk a, tihian chart No.2-ah bawk a awm leh ta a ni. He hla hi 2019 atang khan kumtin Krismas vuakvet-ah Hot 100 chart-ah No.1 a la kai ziah a, kuminah pawh November kar tawp ber chart-ah a No.1 tawh a, Carey hi soloist zinga Hot 100 chart-a No.1 kai thei hla ngah ber niin, a hla 19 a No.1 pui tawh a, hla 20 No.1 pui thei The Beatles chiah a pha lo.
Chart No.3 leh No.4 pawh Krismas hla ve ve niin, Bobby Helms “Jingle Bell Rock” chu No.4 atangin No.3-ah a insawn a, Wham! “Last Christmas” chu No.5 atangin No.4 a kai ve leh ta bawk.
Jack Harlow “Lovin on Me’ chu No.3 atangin No.5-ah a tawlh a, Burl Ives “A Holly Jolly Christmas” chu No.6-ah bawk la awmin, chart No.1 hlui Taylor Swift ‘Cruel Summer’ chu No.7-ah a la awm a, Andy Williams “It’s the Most Wonderful Time of the Year” chu No.10 atangin No.8-ah a insawn a, SZA “Snooze” chu No.9-ah bawk la awmin, chart No.1 hlui Doja Cat “Paint the Town Red” chu No.8 atangin No.10-ah a tawlh ve thun