Tottenham ah Timo Werner

London club lian Tottenham Hotspurs chuan German forward Timo Werner chu RB Leipzig atangin tun season chhungin loan in an hawh dawn.
Tottenham hi Asia Cup khela fehchhuam tur an captain Son Heung-min an chhawr theih dawn loh bakah hliam vanga James Maddison an chhawr theih loh lai a nih vangin forward thar an mamawh a. Premier League-a tawnhriat nei tawh Timo Werner hawh tumin RB Leipzig an dawr a, German club nen inremna an nei fel tawh a. Chelsea forward hlui hian Spurs a zawm fel thuai dawn. Tottenham hian Werner hi tun season chhungin loan in an hawh phawt ang a, an duh chuan season tawp hunah a nghetin an la lut zui thei dawn a. Tun season chhunga a hlawh a tumsak bawk ang.
RB Leipzig leh Germany tan a khelh that vang laiin Chelsea chuan Timo Werner hi kum 2020 khan an la lut a, a manah £45m an seng. Chelsea tan hian vawi 89 khelin, goal 23 a thun hman a. Kum 2022 khan RB Leipzig lamah a let leh. German club naupang, hmasawn chak em em Leipzig tan hian Bundesliga season kal mekah vawi 14 a khel a, goal hnih chiah a thun. Germany tan vawi 57 khel tawh bawk mah se March 2023 hnu lamah ram tan a la inlan leh lo thung. Beisei a phak lohna Premier League-ah a inlan leh dawn a ni a, a hming chher thar a, ram tan khel phak leh turin Tottenham tan a khelh that a tul ang.
Tottenham hian January ni 14-ah Manchester United an hmachhawn dawn a. United an khelh hunah hian an forward thar Werner an chhawr hman a rinawm.