Morocco in last 16 an hnaih

Ivory Coast rama khelh mek Africa Cup of Nations (Afcon) 2023 khelh chhunzawm zel a ni a. Pathianni zanah ui awm taka chak zo lo Morocco chuan last 16 an hnaih viau tawh. Pa-thianni zana inkhel dang ah South Africa chuan si li faiin an khingpui Namibia an sawp.
Group F hmahruaitu Morocco hian Stade Laurent Pokou-ah DR Congo an hmachhawn a, hma takah goal thun mah se an goal an venghim tluan thei lova, last 16 luh chian nghal an tumna an puitlin zo lo.
Champion tura rinkai Morocco tan hian minute rukna lekah Achraf Hakimi chuan Hakim Ziyech corner pet tha tak chu mawi takin a hlap goal a, hmahruaina goal a thun nghal. Hma taka goal an thun vangin awlsam taka chak zui leh mai tura rin an ni a, last 16 an hnaih hman hle tawh. DR Congo hian chawlhlawk hmain goal thun theihna hun tha tak an nei a, penalty an hmu. Penalty hi Cedric Bakambu chuan an thelh hlauh a, an si phurh a sut thei lo. Hakimi goal thun hmanga Morocco in hun rei tak hma an hruai hnuin hun tawp dawn hnaiah goal an chhuah ta nge nge. Minute 76-naah Katompa Mvumpa chuan mawi takin a pet goal a, an si phurh a sut. Hun tawp thlengin goal a luh belh thei lova, Morocco in last 16 luh chian nghal an tumna DR Congo in an dang.
DR Congo lakah chak zo lo mah se Morocco hian khelh hnih atanga point li hmuin Group F-ah hma an hruai chhunzawm, Morocco hian an khelh hmasak berah si thum fai ngawta Tanzania an sawp vangin an dinhmun a that phah viau a. Pathumna awm mek Zambia an hma-chhawn hunah an che-sual viau a nih loh chuan last 16 an luh ngei a rinawm.
Pathianni zana inkhel dangah Group E mawng-phaha awm mek South Africa chuan si li faiin Namibia an sawp a, pahnihnaah an inhlangkai. South Africa tan hian Themba Zwane-a’n goal hnih a thun a. Percy Tau leh Thapelo Maseko ten goal khat ve ve an thun bawk.
Afcon 2023 khelh mekah champion lai Senegal in last 16 an lut chiang tawh a. Cape Verde Islands in last 16 an luh chian tawh bawk laiin he inelnaa champion ngun ber Egypt chu tla thei dinhmunah an ding