Ukraine leader chuan UK officials te a hmuh hnuah France leh Germany hnenah fighter jet a dil zui a.
President Volodymyr Zelensky chuan ram pahnih hruaitute hi Nilaini tlai lam khan Paris khawpuiah hmua titipuiin Ukraine chu thlawp zui zel turin a ngen a.
-- Advertisement --
France’s Emmanuel Macron leh Germany’s Olaf Sholz te chuan indona kal mekah Russia chuan chakna a chang tur a ni lo an ti zui bawk.
Zelensky hian nimin lam khan Brussels-ah European Union hruaitute hmuin fighter jet a dil zui leh dawn nia sawi a ni a.
Indona neih mekah Ukraine tan fighter jet leh long-range missile te chu tihmakmawh a ni tia sawiin tun hnaia Western ram te chuan Leopard 2 tank pek erawh an lo remti tawh a ni.
Nilaini tla lam khan Macron leh Scholz te chuan Zelensky tawiawmin news conference an neihah France leh Germany tena Ukraine hnena indona tank, fighter jet leh long-range missile an pek chuan ‘game-changer’ a ni thei tiin an sawi.
Fighter jet pek chungchang chu sawihonaah a tel thu sawiin mahse ralthuam in pe tur pawhin hun a tlem em em thu an sawi bawk a.
Macron chuan Ukraine chuan France thlawpna a nei tia sawiin ‘Ukraine-in chakna a chan ngei theih nan leh a legitimate rights te a neih let vek theih nan a pui zel ang’ tiin a sawi a.
Scholz pawhin, “Kan dinna kan la thlak lo. He indonaah hian Russia a chak tur a ni lo”, tiin a sawi bawk.
Mahse, ram pahnih ten Ukraine hnenah fighter jet an pe ngei dawn em tih chu a la chiang chuang lo va. A hmain Zelensky chuan Russian President Vladimir Putin nena Russia in Ukraine a run hnu pawha phone a inbiakna nei reng Macron lakah ngaihdan siam har a tih thu a lo sawi tawh thung a.
Mahse tun hnaiah Ukrainian president chuan French newspaper Le Figaro hnenah Macron chu a inthlak danglam taa a ngaih thu a sawi a. Tunah chuan Ukraine-in hnehna a chan ngei theih nana a thlawp thu sawiin chu chu thla kaltaa tank a pek danah a lang tiin a sawi bawk.
Zelensky hian Brussles a pan hmain UK Parliament-ah thusawina a nei bawk a, chutah chuan London chu Ukraine hnena fighter jet pe turin a ngen a ni.
“Zalennain chakna a chang ang – Russia a chak dawn lo tih kan hria a ni,” tiin Westminster Hall a MP rual te hmaah a sawi a, ‘Kan dam laia hnehna pawimawh ber turah’ UK chuan kan ram min thlawp a ni tiin a sawi bawk.
Downing Street chuan Defence Secretary Ben Wallace chuan UK in aircraft a pek theih dan tur te a enfiah nghal thu sawiin mahse hun rei tak la ngai tur niin pilot te training tur pawhin a kuma kum a ngai dawn tiin a sawi.
Hetih lai hian Russia chuan Ukraine hnenah ram dangin aircraft an pe a nih chuan Moscow chuan a chhang let ang tiin a vau lawk zui nghal thung.