Rock & Roll Hall of Fame 2024 Nominee-ah Cher, Kravitz & Carey a tel

Class of 2024 nominee zingah a vawi khatna an awm nual mai. Nizan hmasa khan Rock & Roll Hall of Fame chuan kumina lakluh tura thlan theih te, nominee an puang a, artist 15 hming an chhawp chuak a, chung zingah chuan Mariah Carey a tel.
2024 Rock Hall nominee-te chu: Queen of Hip-Hop Soul Mary J. Blige; powerhouse singer-songwriter Mariah Carey; half-century-plus pop icon Cher; roots rock jam band Dave Matthews Band; hip-hop pioneers Eric B. & Rakim; stadium rockers Foreigner; arena-filling guitar pro Peter Frampton; alt hard rockers Jane’s Addiction; funky R&B legends Kool & the Gang; rock standard Lenny Kravitz; Britpop poster boys Oasis; alt pop icon Sinéad O’Connor; metal god Ozzy Osbourne; R&B purveyors Sade; leh alt hip-hopers A Tribe Called Quest te an ni.
Kumin nominee hmun thuma thena hmun hnih te chu nominee an nih vawi khatna a ni a, chung zingah chuan Cher, Frampton leh Foreigner te pawh an tel. Anni hi nominee -a an lan theihna kum vei deuh tawh mah se tun hi an vawi khat lanna a ni a, Mary J. Blidge, Eric B & Rakim, Jane’s Addiction leh Dave Matthews Band te chu an vawi hnih lanna niin, A Tribe Called Quest chu an vawi thum lanna a ni ve thung. Kumin nominee Ozzy, kum 75, hi a band Black Sabbath ang chuan hall of fame-ah hian lakluh a lo ni tawh bawk a ni.
Nikum nominee, hall of fame-a lak luh tura tlan tlin an nih tak loh avanga boruak pawh nei deuh hat The White Stripes chu kuminah an lang nawn ta lo a, chutiangin nikuma lang Cyndi Lauper pawh kuminah a hming a lang nawn ta lo bawk.
2024 nominee-te hi voting body a vote nei mi sang chuangin vote hmangin lakluh tur hi an thlang dawn a, voting body-ah hian artist, historian leh music industry lama mi pawimawh tak tak an tel a, kumina lak luh tura thlan Rock Hall Class of 2024 chu April thla chawhnu lamah an puang dawn a ni.
Rock & Roll Hall of Fame-a lakluh tura an hming chhawp chhuah ni thei tur chuan artist te chu an record an tlangzarh hmasak ber atanga kum 25 a ral phawt a ngai a, chutah pawh a duh apiang tan nominee a nih theih ngawt loh a, nominee tur pawh a tlangtu an la awm leh zel a ni. Kumin induction ceremony chu Cleveland-ah neih a ni ang.