Table chung berah Nuggets
Ningani zing khan NBA Regular season khelh chhunzawm a ni a, champion lai Denver Nuggets chuan an khingpui Minnesota Timberwolves an hneh a, Western Conference hmahruaitu thar an ni. Inkhel dangah Dallas Mavericks chuan Miami Heat an hneh a, parukna nih an beiseina an tihtawpsak.
Champion lai Denver Nuggets hian Western Conference hmahruaitu thar ni turin Minnesota Timberwolves lakah chak ngei an mamawh. Chak an mamawhna inkhelah bul an tan tha lova, hnufual zawk ni chungin chawlhlawk an hmang. Chawlhlawk hnu amah an insiamtha a, an khingpuite lehthalin hnehna pawimawh tak an chang ta tho thung.
Nuggets leh Timberwolves te hian hmuhnawm takin bul an tan a, quarter khatnaah point hnihin Timberwolves an chungnung thei hram. Quarter hnihnaah Nuggets an insiamtha thei chuang lo va point khatin an hnufual zui leh a, point thuma hnufual zawk chungin chawlhlawk an hmang.
Hnufual zawk ni chungin chawlhlawk hmang mah se chawlhlawk laiin Nuggets an insiamtha a, chawlhlawk hnu lamah mit la takin an inlan. Champion lai hi quarter thumnaah point tuk laiin chungnung zawkah an tang a, point thumin an khingpuite an lehthal phawt. Quarter hnuhnung berah point rukin an chungnung zui leh a, an khingpuite hi point 116-107 a hnehin, Western Conference hmahruaitu thar an ni ta a ni.
Minnesota Timberwolves an hneh tum hian Nuggets tan Nikola Jokic chuan point 41 a thawkchhuak. Nuggets hian hmahruaitu thar an nihna humhimin regular season an khar theih a beiseiawm ta hle. Nuggets laka tlawm Minnesota Timberwolves hi pahnihnaah an tlahniam a, Oklahoma City Thunder nen an record a intluk mek.
Nilai zinga inkhel dangah Dallas Mavericks chuan point 111-92 in Miami Heat an hneh. Mavericks lakah an tlawm vangin Heat in parukna ni chunga regular season khar an tumna an puitlin zo lo. Miami Heat an hneh tum hian Mavericks tan Luka Doncic chuan point 29 a thawkchhuak a. Kyrie Irving chuan point 25 a thawkchhuak ve bawk. Eastern Conference-a inkhel dangah pahnihnaa awm mek Milwaukee Bucks chuan point 117-99 in Orlando Magic an hneh a. Brooklyn Nets chua point 106-102 in Toronto Raptors an hneh ve bawk.
Western Conference Table
Team W L W/L%
Denver Nuggets 56 24 .700
Timberwolves 55 25 .688
Thunder 55 25 .688
LA Clippers 51 29 .638
Dallas Mavericks 50 30 .625
New Orleans Pelicans 47 32 .595
Phoenix Suns 47 33 .588
Sacramento Kings 45 34 .570
Los Angeles Lakers 45 35 .563
Golden State Warriors 44 35 .557
Houston Rockets 39 40 .494
Utah Jazz 29 50 .367
Memphis Grizzlies 27 53 .338
Portland Trail Blazers 21 58 .266
San Antonio Spurs 20 60 .250