India-in China activity dodal ti

“Kum 2023 khan global leader a inpho langin leh Indo-Pacific region ah China activity dodal ngamin nasa zawka hma lain a military te pawh tunlai zawka siamin Russia ralthuama a innghahna a tihniam tawh hle” tiin top US intelligence official te chuan US Congress an hrilh.
Lt. Gen. Jeffrey Kruse, Director of the Defence Intelligence Agency chuan China doletna tura Congressional hearing neihnaah, “Tun kum kalta khan India chuan global leader a nihna pholangin Group of 20 economic summit a thleng a, Indo-Pacific region ah pawh PRC’s (People’s Republic of China) activity dolet zawngin hma a la a ni” tiin Kruse chuan House Armed Services Committee member te hnenah a sawi.
India chuan Indo-Pacific ah ram dang te nena thawhhona a ti tha zual a. Training leh defence sales te neiin chu mai bakah US, Australia, France leh Japan te nena inlaichinna a siam tha zual bawk a ti bawk.
China chuan South China Sea pumpui deuhthaw a ram angin a rin lut a, hei vang hian The Philippines, Vietnam, Malaysia, Brunei leh Taiwan te nen maritime area ah inbakaihna nasa tak an nei reng a ni.
“Kum 2023 khan India chuan China el pha turin a ralthuamte tunlai thei ang berin a thuam tha zel a, Russia laka a innghah burna pawh a tihniam nasa hle. India chuan a tum khat nan aircraft carrier a siamchhuak bawk a, defence technology pawimawh lamah Khawthlang ram te nen inremna an siam bawk” tiin Kruse chuan a sawi bawk.
“India chuan Russia in Ukraine a runnaah neutral a nihna a lantir tlat bawk a. Russia chu India-in defence partner a neih len ber la ni zui zel thungin New Delhi chuan Moscow hnen atangin raltuam a la lei reng a, tun hnaiah pawh S-400 surface-to-air missile system pawh a lei a ni” tiin Kruse chuan a sawi bawk.
India leh China chu kum 2020 a Galwan a inbeihna thlenga India sipai 20 leh China sipai PLA (People’s Liberation Army) panga in nunna an chan phah hnuah a lo tang ru reng bawk a.
“October 2023 khan senior India leh PLA officer te chuan eastern Ladakh-a ram inchuh chinfel a nih theih nana inbiakna tum sawm hnih neih hnuah pawh hmun hnih chu chingfel thei lovin an la awm zel a. Heng lai hnaiah hian ram pahnih te chuan sipai 50,000-60,000 vel ve ve an dah a, ramri hnaiah military infrastructure an thawm tha bawk” tiin Kruse chuan a sawi a.
Pakistan chung changah Kruse chuan international suppot ngenin UN Security Council pawh Kashmir a India nena buaina an neihah a ngen a ni a ti bawk a. A hranpain Islamabad leh New Delhi te chuan February 2021 atang khan Line of Control ah inkahhaina derthawng tak an siam a ti bawk a.
“Pakistan chuan a economic dinhmun chhe em em chung pawhin a nuclear modernisation a kalpui reng bawk a. Pakistani security forces te leh civilian te laka firfiak te tharum thawhna chu nikum khan a pung” tiin Kruse chuan a sawi bawk.
Kum 2023 khan militants te chuan security forces 400 chaung tihlumin nikum khan Pakistani security forces te chuan ni tin counterterrorism operation kalpui ang an ni, a ti a.
“Pakistan chuan India nena inlaichinna dawrawm tak an neihna chu a defence policy siam nan ber a hman a ni a. Mahse, cross-border violence chu February 2021 a inkahhai siam a nih hnu atangin a tlahniam” tiin a sawi. “Islamabad chuan a nuclear thuamte tichangkang zelin a nuclear hmanruate pawh security tha zawkin a thuam a. Nikum October khan Pakistan chuan hlawhtling takin Ababeel medium-rang ballistic missile hlawhtling takin a enchhin a ni,” tiin a sawi a ni.