Pro Volleyball bul \an fuh Tuichangral

Aizawl pawn atanga champion hmasa ber nih an tumna tharthawh lehin Tuichangralin tha takin Ather Pro Volleyball League-ah bul an tan a, Inrinni zanah set hloh loin Chhinga Veng Spikers an hneh.
LPS Arena, Falkland-ah Sonu leh Zomuansanga’n team tanpuiin inelna sang tak karah set thum an la zawn nghal a, 25-21, 27-25, 25-23-in an chak.
Mizoram volleyball inelna sang berah Tuichangralin season nga an hman zawnna a ni a; kum kalta khan league-ah 3-1-in Chhinga Veng an hneh lo a, a hnuah semi-final pal tlang zo loin Thutak Nunpuitu Team lakah an tla a ni.
Coach David Aizampuia Fanai chuan an tum ram thleng turin team a din thar a; boruak thar hipin Haryana atanga an lakluh Sonu chuan vawi 19 vaw tlain point 10 a paih a, Mizo leilunga a inkhelh hmasak berah Kuriz Player of the Match lawmman a dawng nghal.
2023 Inter Village champion Khawhai player tha pathum zingah Zomuana’n a thawhhlawk ber a, point 13 hmuin vawinga a tisual.
Set thumnaa langsar Lalhmunmawia (Mapuia) chuan um riat hlap thlain point hnih a hloh a, Saidingpuia Sailo chuan point nga a hmuh aia tam point sarih a paih a ni.
Tun season-ah 2019 champion Chhinga Vengin harsatna an tawk a, dinhmun chiang loa engemawchen an awm avangin Pro Volleyball atan inpuahchahna an nei tam hman lo.
Hun tepterah player khawnkhawmin state dang atanga an lakluh Yougank Baliyan chuan point 18 hlawhin point sarih a hloh a, Mizo player zingah point 10 hmu phak an awm lo.
Set hmasa berah Yougank chuan vaw tlain 15-15-in Tuichangral an nih rual a, mahse, hemi hnu hian khaw chhak team tan Sonu, Vanlaltanpuia leh Zomuana’n hlap tla zawnin 21-16-in hma an hruai a, Spikers-in an um phak zui tawh lo.
Set hnihnaah a tir atangin Tuichangralin hma an hruai a, Saitea’n a vuak tlak rualin 24-22-in an sang. Chhinga Veng tan Lalramhluna’n hlap tlain Yougank chuan net chhungah Saitea vuak a dansak bawk a, 24-24 niin Spikers-in set an hnaih lai ber a ni.
25-25 a nih leh hnuah Lalbiakmuana’n a club hlui Chhinga Veng lamah a hlap tla a, Tuichangralin Ramhluna vuak dang zui lehin set hnih an la zawn.
Set thumna thlengin an inhnehtawk hle a; 23-23 a nih hnuah captain Mapuia’n hnehna kawngah team hruaiin vawi hnih a vaw tla zawn.
Khelho hnem leh ball vuak tlak awlsam zawk Tuichangralin hun pawimawhah danglamna siam turin theihna an nei a, Spikers-in set la tur khawpin a tawp a thleng zo rih lo.
Tuichangral tan |pa’n tum 10 hlap tlain point hnih a paih a, a tira lut zinga tel lo Biakmuana’n point khat hlohin vawi nga a vaw tla hman. Chhinga Veng tan Lalchungnunga leh Thangzika Pautu chuan point kua ve ve hmuin vawi thum leh vawi nga an tisual a ni.
Kum 2018-a final lut Tuichangralin an duhthusam tihlawhtling turin fiahna dan an hmachhawn leh nghal dawn a, Thawhlehni zanah champion lai TNT nen an inkhel ang. Chhinga Veng hmabak a hautak zui dawn bawk a, tun dinhmuna rin hlawh Hunthar nen Ningani zanah an intawng dawn a ni.