Madrid last 16 lut Nadal

Vawinga a champion tlin tawhna Madrid Open khelh mekah Spaniard Rafael Nadal chuan darkar thum chuang rim taka thawk chungin 91st-ranked Argentine Pedro Cachin lakah Thawhtanni zan khan 6-1 6-7 (5-7) 6-3 hnehna a sualchhuak thei hram a, last 16 lamah nizan khan 30th seed Jiri Lehecka a hmachhawn zui leh nghal a, result tarlan hman a ni lo.
Kumin kum tawp ruala tennis inelna chawlhsan a tum ve tawh thu lo puang tawh kum 37 mi Nadal tan tun hi Madrid clay-a a inla n tawpna ni tawh tura ngaih niin, harsa taka hnehna a sualchhuah hnuah 22-times Grand Slam champion chuan a chipuite hmaa a tahtawla a la inkhel thei chu a tan thil hlu tak a nih thu a sawi.
Czech Lehecka khan Thawhtanni zan round of 32 match dangah 6-4 7-6(7)-a Brazilian qualifier Thiago Monteiro hnehin fourth round a lut.
Great Britain innghahna lian Cameron Norrie erawh fifth seed Casper Ruud lakah straight sets hmangin a tlawm thung.
Karliamta maia Barcelona Open title la fel hlimhlawt Norwegian Ruud chuan nizan quarter-final luh inchuh match pakhata Canadian Felix Auger-Aliassime hmachhawn thei turin Norrie lakah 6-2 6-4 hnehna a sualchhuak.
Thawhtanni vek khan Italian top seed Jannik Sinner pawhin Russian Pavel Kotov lakah 6-2 7-5 hnehna changin kumin chhunga a title palina tur beisei zui thei turin fourth round a lut a, nizana Khachanov a hmachhawn result tarlan hman a ni lo.
Australian Open champion Sinner hi kumin bikah vawihnih chiah a la tlawm.
Third seed Daniil Medvedev pawh round of 16 lut zingah telin, set hmasaber a hloh zet hnuah 5-7 7-6 (7-4) 6-3-in American Sebastian Korda a lehthal a, nizan Madrid Open 4th round inkhel pakhatah Bublik a tum zui ve leh.