Khelo women’s football Springfield HSS

Mizoram Football Association leh Sports & Youth Services Department tangkawpin an buatsaih Khelo India Women’s Football League hmasaberah Springfield Higher Secondary School, Aizawl an champion ta.
Nimin khan Aizawl Sipai Lammuala final hmuhnawm takah Springfield HSS hian St. Joseph Higher Secondary School, Aizawl chu sihnih faiin an hneh a, goal hnihte hi Lalsangpuii Sailo leh Vanlalrohluite’n extra time-a an thun a ni.
Hun pangngaiah goal a luh loh avangin minute 20 hun pekbelh an khel a, Springfield hian chhanlet loh goal hnih an nei ta a, champion’s trophy Nomawi leh cheng singli an dawng a; pahnihna St Joseph HSS-in trophy leh Rs. 15,000 an dawng thung.
Final-ah hian player of the match atan J. Lalparmawii, Springfield HSS thlan a ni a, tournament chhunga thiam ber lawmman best player trophy chu Springfield HSS innghahna lian Lalsangpuii Sailo niin, St. Joseph HSS star player Lallawmzuali kutah top scorer award hlan a ni thung a, mimal lawmman dawngtute hian tangka fai Rs. 2,000 bakah trophy an dawng.
Fairplay lawmman dawngtu St. Joseph HSS. kutah Rs. 5,000 leh trophy hlan a ni ve bawk.
Khelo India Women’s Football League final-a khhualian Sports & Youth Services Department Secretary Lalramsanga Sailo, IRS chuan MFA leh SYS-te’n Khelo Women’s League hlawhtling tak an buatsaih chu lawmawm a tih thu leh India sorkarin hmeichhiate dinhmun chawikan duha infiamna lamah pawh nasa taka tan a lak thu a sawi a, theihna/talent nei thate sang taka vawrh zel an nih tur thu tarlang telin, lawmman a sem nghal bawk.
MFA hruaitute leh Women and Child Development hruaitute’n lawmman thenkhat an sem ve bawk.
Nimin Khelo India Women’s Football League final-ah khan Miss Mizoram 2024 winner leh contestant dangte inlanin, MFA Women’s Committee member-te nen penalty shootout-ah an inel a, inkhel entute mit an titlai hle.