Champion TNT an tho leh nghal

Championship hawnnaah champion lai Thutak Nunpuitu Team an talbuai a, set khat mah la loin Hunthar lakah an tlawm a, mahse, Muanna Veng team hi an insiamtha har lo a, Thawhlehni zan Ather Pro Volleyball League-ah champion zia lantirin Tuichangral lakah set thum set hnihin hnehna kawng dik an zawh zui leh nghal.
LPS Arena, Falkland-a mipui pung khawm khat vek hmaah Zosangzuala (Lalmama) chuan TNT fuihphurin set thumnaah 22-16-a sang fal tawh Tuichangral an pawtthla a, inelna sangah fiahna paltlangin 25-22, 17-25, 25-23, 19-25, 16-14 hnehna an sualchhuak.
Tuichangralin an khelh hmasak berah set thum faiin Chhinga Veng Spikers an hneh ve thung a, rin an hlawh zui.
Season liamta khan TNT-in league leh semi-final-ah Tuichangral an hneh ve ve.
Tun season-ah player chhuak leh lakluh langsar awm December thla khan MVA Cup-ah TNT an champion a, group league-ah 3-2-in Tuichangral an hneh hram a, final-ah intawng lehin set hloh loa chakin an champion.
Hunthar hmaa chiang taka an tlawmna chhangletin TNT-in Thawhlehni zanah an mamawh hnehna an chang a, Lalmama’n hmun pawimawh luahin point li chiah hlohin 23 a thawkchhuak a, Kuriz Player of the Match lawmman a dawng. 2022 Pro Volleyball-ah Tuichangralin 3-1-in league-ah TNT hneh mah se tun kum hnih chhungin an lakah harsatna an tawk. Inrintawkna an neih san lai takin an fimkhur tawk lo a, ball vuakah el tham ni chung siin tihsual an ngah a, inelna hrang hranga an insut hnuhnun vawingaah Muanna Veng team an chak vek.
Chhinga Veng an hneh tuma a tira lut zinga tel lo Lalbiakmuana’n hun pumin Tuichangral tan a khel a, point 17 hlawhin point li a paih laiin Sonu chuan vawi 28 vaw tla mah se tum 20 a tisual a, a khelh hmasak a pha lo.
TNT setter Lalliankima’n Lalmama hnenah ball a pe hnem a, a hlap tlak hnuin Tuichangral spiker Zomuana’n a vaw kai lo zui ve leh a, set khatnaah 16-12-in hma an hruai. A hnuah Zomuana’n hlap tlain 20-20 ni leh hman mah se hun pawimawhah Valbuanga’n a theihna lantirin 24-22 a nih laiin tha takin a vaw tla.
Lehlamah Zomuansanga’n point 13 hlohin vawi 21 a hlap tla a, Vanlaltanpuia’n point 13 hmuin pont hnih chiah a hloh a, team an chakpui zo lo.
Tuichangral player-te’n danglamna siam turin vuak tlak mai an awlsam a, set an hloh hnuah insiamremin inkhel an thunun hneh hle. TNT nawr tawmin set hnihna an lak hnuah harsa lo taka set hnih la zawn thei turin point rukin an sang a, point thum hmuh belh chiah an mamawh.
Hun khirh takah TNT-in champion ni awm rengin an beilet a, Sadrak Fanai chuan vaw tlain Lalmama hoin phui takin net chungah lehlam an dang zui.
Tuichangral rinrawl Zomuana leh Sonu chuan an hlap tla thei mai lo a, 22-22 a ni chho.
Zomuana’n vaw tlain Tuichangral an sang zui leh na a, boruak sangah lehlam an nghet zawk.
Lalmama’n a hlap tlak hnuah khaw chhak team setter C. Zonunmawia’n a tisual a, TNT-in tlang turin point khat chiah neih belh an mamawh laiin Saidingpuia Sailo chuan point a hloh a, khelmuala hun a hman chhungin vawiruk a vuak tlak zat chiah point a hloh.
Set linaah Tuichangral kir lehin Biakmuana, Zomuana leh Sonu bakah rang taka ball hniam vawtu |pa-te an inkawp fuh leh a, TNT-in ngam lo mah se Tuichangral player pawimawhte an insawrbing rei thei lo a, set nganaah boruak a danglam thar leh.
A chak tur tihfelna hnuhnungah talbuai hmasain 9-4-in Tuichangral an hniam a, Zomuana’n point hmu zawn chhoin 12-10-in an sang ve leh a, chak tlang thei turin hmabak an ngah tawh lo.
Rilru lamah TNT-in an paukhauh tih lantir ve thungin Lalmama’n Sonu-a vuak a dang tla a, 13-12-in an lehpel. 14-14 thlengin Tuichangralin nih rual leh thei mah se Valbuanga’n vaw tlain TNT-in point hmuh belha chak thei dinhmun an luah.
Khaw chhak team-in point an hmuhlet theihna hun tha hlohin Laldinchhunga’n remchang a neih phah a, fuh zeta a hlap tlak rualin league kal meka a vawikhatna’n champion lai an chak.
Zuamawm an nih hnuah TNT-in lei rem an rap thar leh a, khelh hnihah league point hnih kawlin Inrinniah Durtlang North an khelhpui leh dawn.
Tuichangralin set hnih an lak ve avangin point khat an neih belh a, league point li thawkchhuak tawhin, May 11-ah Durtlang North bawk an hmachhawn ang.
Nizan hmichhe inkhel result tarlan hman lohah Luangmual leh Diakkawn intumin, zanin dar 8 hian mipa lamah Hunthar leh Chhinga Veng Spikers an inhmachhawn ve bawk ang.