Pro Volleyball: Hunthar chak zawn

Anurag Rawat chuan kawng dikah Hunthar hruai chhunzawmin Ningani zan Ather Pro Volleyball League-ah set thum faiin Chhinga Veng Spikers an hneh a, set hloh loa khelh hnih an chak zawnna a ni nghal.
LPS Arena, Falkland-ah Delhi tlangval Anurag chuan set khatnaah vawi 15 a vaw tla hman a, Fabian Lallunghnema leh Lalnunfela’n thlawp zuiin 25-21, 25-20, 25-20-in an chak.
Vawikhat aia tam champion thei awmchhun Huntharin nikumah a tum thumna’n trophy la thei turin hun tha an nei a, final-ah set hnih set khata hma an hruai hnuah Thutak Nunpuitu Team-in an pawtthla.
Kar hmasa Thawhlehni zan khan championship hawnnaah TNT nen intawng leh nghalin, kum kaltaa rilru na taka an tlawmna chhangletin set thum faiin an chak a, Anurag chuan point 22 hmuin 13 a hloh a, Fabian-a leh Wilson Lalremruata’n point 10 ve ve an hlawhchhuak bawk.
Chhinga Veng hmaah hmasawn zawkin Tuipuiral spiker hlui Anurag a inlan a, tum 26 hlap tlain vawi sarih a tisual a, Kuriz Player of the Match ni zawn hmasa ber a ni.
Fabian-a’n hlawk zawkin a khel bawk a, point thum chiah hlohin 14 a thawkchhuak a ni.
An khelh hmasak vawihnihah Spikers-in tournament tan hmaa rin hlawh ve ve an hmachhawn nghal a; set la loa Tuichangral laka an tlawm hnuah Hunthar hmaah Yougank Baliyan a mal tan viau a, tum 20 hlap thlain point kua a paih a, set a lakpui zo lo.
Lalneihpuia Hrahsel leh Lalnunpuia chuan point ruk hmuin tum li an tisual ve ve a, Chhinga Veng mizo player zinga thawhhlawk ve ve an ni.
Set khatnaah Anurag a filawr a, ball a hmuh vaw tla deuh vekin point 15 a hmu a, tum hnih a hloh. 13-8-a Hunthar an san hnuah Spikers-in an hnaih chilh zo lo tluan a; Lalchungnunga’n a hlap tlak rualin 23-21-in an inkar tizim mah se Fabian-a’n a chhanglet a, Chhinga Vengin point hloh zuiin set an hloh.
Set hnihna tir lamah Spikers tan Yougank rin tlak viau mah se Huntharin a vuak an dansak rualin 13-9-in hma an hruai a, hawi kir loin 23-20-a nih hnuah Anurag leh Fabian-a’n an hlap tla zawn a ni.
Set khat tal lak tumin Chhinga Vengin player an siksawi nasa a, set thumnaah 14-14 thlengin an inum tawk hle. Ball vuak tlak leh lehlam hlap lo lak leh dan kawngah Hunthar an chungnung a, derthawng loin set hnihna ang bawkin 23-20 a nih hnuah Anurag leh Fabian-a’n an vaw tla zawn leh a ni.
Hunthar tan Nunfela’n point kua hmuin tum thum a tisual a; R. Lallawmkima’n vawi nga vaw tlain point khat a paih bawk. An bitum lakah hmahruaitu zel an nih avangin boruak ritin a tibuai rih lo a, an player tute pawhin inringtawk takin an khel thei.
Khelh hnihah set hloh loin Huntharin point ruk an hmu a, table-ah sang berin, May ni 7 zanah kai thar Hlimen nen an intawng ang.
A mawngphaha awm Chhinga Vengin May ni 9 zanah TNT an su dawn a, a awlsam dawn lo hle a ni.