Singapore PM thar atan Lawrence Wong

Singapore Prime Minister thar Lawrence Wong chuan thuneihna a chan hnuah ‘vawiin aiin naktuk tha zawk’ a awm theih nana thawh a intiam a, Asian financial hub-ah ngelnghehna a awm theih nan hnathawh a tum thu a sawi.
US-a zirchhuak economist Wong hi kum 51 mi niin kum sawm hnih chuang thuneihna chang tawh kum 72-a upa Lee Hsien Loong a chawlh tak hnuah a thlak ta a ni. Wong hi Singapore in kum 1965 a independence a nih hnua prime minister pali a neihna tur chiah a ni bawk.
Lee chawlh chuan Singapore first leader leh colonial trading outpost mai mai khawvela ram hausa ber pakhata chhuah theitu leh kum 31 ngawt thuneihna chang Lee Kuan Yew chhungkua tena an kaihhruai char char chu a tawp tir ta bawk.
Wong chuan a thlaktak Lee chu nasa taka fakin mahse a leadership style chu a danglam dawn tiin a sawi thung a. Khawvelin harsatna a tawh mekah Singapore a kalpui tum dan a dan tur thu a sawi.
“Thuneihna inthlak hi hruaituteah chauh a ni lo generation inthlak a ni tel bawk,” tia sawiin Wong chuan, “Kan thiam dan angin kan kaihruai ang a, huaisen tak leh nakin ngaihtuahin hma kan la ang,” tiin a sawi.
Singapore-a thuneihna inthlak chu People’s Action Party (PAP), khawvela political party upa ber pawl ni tawh leh governance felfai leh tha kalpuia lar te chuan uluk taka an ruahman a ni a. Thawklehkhata inthlakthleng bur lam an kalpui dawn lo tia sawi a ni.
Wong hi civil servant ni thin a hnua politician a inlet niin Covid-19 lenlaia Singapore-in hmalakna a kalpui dan atanga lar chho zual niin mahse prime minister ni tura first choice a ni lo thung.
Heng Swee Keat, central bank chief hlui leh education minister chu Lee thlak tura ngaih ber niin mahse kum 2021 khan a inhnukdawk a. Chumi hnuah People’s Action Party te chuan kum 2022 khan Wong chu thlang chhuakin deputy prime minister ah dah zui nghal a ni.
Wong chuan Singapore chuan khawvel hlauhawm zawk, tharumthawhna nasa, buai nuai a hmachhawn dawn tia sawiin khawvel ram thuneituten new world oder siam tuma an inbeih laiin protectionism leh nationalism chu a thuk tial tial dawn a ti bawk.
China-US inngur meknaah Singapore chu neutral a nih ang bawkin ram pahnih te nen chuan an thawkho zui zel ang a ti bawk.
Lee kaihhruaina hnuaiah Singapore chu khawvela ram hausa ber pawlah a chhuah thei a, chutih rual chuan khawvela chenna hmun hautak ber pakhat a ni tho thung. PAP te chu sorkar thununna khauh lutuk leh engkimah sorkar in a hre ber tih ngaihdan nei leh media censorship an kalpui bakah lungawilote laka dan khauh tak an kalpuiah sawisel an tawk thung.
Sum lakluh inthlau lutuk te, chenna in dinna man sang lutuk te, immigration tam avanga hmun bichit ta lutuk te free speech restriction nasa te chu PAP te thuneihna leh thiltihtheihna tidal tial tialtu tia sawi a ni bawk.
“Singapore-a party pakhat chauh thuneihna chu tlahniam zelin PAP leadership te chona a nasa tial tial tawh” tiin Eugene Tan, Singapore Management University a law professor chuan a sawi.
Bridget Welsh, Southeast Asia political expert chuan Lee kha ‘Kum 2008-2009 financial crisis leh Covid-19 lai te hun harsa leh khirh taka ngawi renga hlawhtling taka Singapore khaichhuaktu a nihnaah hriat reng a hlawh ang. Singapore ropui tak a din a, mahse, Singapore chu a danglam nasa tawha demand a sangin hei vang hian Wong tan sorkar kalpui zel danah chona nasa tak a awm dawn a ni’ tiin a sawi.
Wong chu Malaysia atanga Singapore-a inlakhran khan kum sarih mi chauh niin a pa chu China atanga migrant niin a nu chu zirtirtu a ni thung. PAP leader dang te ang lo takin mihausa leh thiltithei chhungkua chhuak a ni lo. Mahse, chutak chu common citizen te nen inlaichinna tha zual nei thei tura chhertu a ni zawk ang an ti thung.
US-ah lehkha zirin University of Michigan atangin economics-ah master degree a la a, a hnuah public administration master degree chu Harvard University atangin a la leh a ni. Kum 2011 a politics a luhchilh hmain Lee principal private secretary hna a chelh bawk a ni.
Social media khawih nasa a ni a, nupui neiin fa a nei lo thung a, a mimal nun phochhuak lo tak niin mahse music leh ui a ngaina hle thung. Roger Federer fan a ni bawk a, a guitar perh lai video a phochhuak fo bawk.
Wong hian Singaporeans ten hmasawnna kawng zawh theih nan leh generation thar te tana inclusive agenda a awm theih nan an ngaihdan thawhna tur Forward Singapore a siam bawk a.
“Singaporeans te ka tiam duh chu ka thinlung zawng zawngin intan ka thawk ang. Status quo duhin ka awm ngai dawn lo va, vawiin aia naktuk a that zawk nan ka thawk ang,” tiin Wong chuan a sawi.