Thailand Open badminton hnehtu Satwiksairaj-Chirag

Top seeded Indian pair Satwiksairaj Rankireddy leh Chirag Shetty chuan nimin, Pathianni Thailand Open Super 500 badminton tournament men’s doubles final-ah minute 45 lek chhungin unseeded Chinese pair Chen Bo Yang leh Liu Yi lakah 21-15, 21-15 hnehna an chang a, an ropuina tizual turin tournament chhung zawng khan game khat mah an hloh lo!
Hnehna an chan hnuah Chirag chuan, “Kan tan Bangkok hi a special bang thei lo. He hmunah hian kum 2019 khan kan Super Series title hmasaber kan hlawhchhuah bakah he khawpuiah vek hian Thomas Cup kan lo chawi tawh a, chuvangin he hmun hi kan tan chuan a dangdai bik a, he khawpui kan thlen tawh hi chuan hlimin min hmuak thin,” a ti.
Asian Games gold medallist pair hi tunhnaia an tournament khelh hnuhnung thenkhatah khan an tlahniam hman a, All England Championships-ah second round paltlang zo loin, Asia Championships-ah phei chuan Satwik inhliam avangin an inlan thei lo.
Thomas Cup campaign-ah pawh beisei an pha lo a, mahse, Thailand-a an rawn vul chhoh leh takah hian kan hma lawka Paris Olympics atan inrintawkna an neih len phah ngeiin a rinawm.