Billboard Latin Women in Music 2024-a Camila Cabello leh Kali Uchis an chawimawi dawn

2024 Billboard Latin Women in Music event June ni 9-a neih turah Camila Cabello chu Global Impact award hlan a ni dawn a, Kali Uchis-i’n Rising Star a dawng bawk ang. He event hi Latin hmeichhe musician te chawimawina niin, a Tha zawnga music industry-a hnuhma nei te nenah hlan Thin a ni.
Billboard official press release-ah chuan, “Singer-songwriter Camila Cabello hlawhtlinna leh a contribution hian Global Impact chawimawina hi a phu a ni, he award hi khawvel huapa ngaihven hlawh hmeichhe artist theihna ropui tak nei ten rimawi mai ni lo popular culture a a Tha zawnga nghawng nei leh khawvel huapa Latin culture chawisangtu te hnena hlan Thin a ni,” tiin an tarlang.
He ofificial press release-ah hian Camila Cabello hla hit ‘Havana’ leh ‘Senorita’ te chuan Camila aw te chu khawvel huap hla lar sak chhuah nan chauh ni lo immigration, mental health leh hmeichhe dinhmun chawisanna atan a hmang Tangkai hle niin an tarlang bawk.
Kali Uchis chungchang an press release-a chuan, “Uchis hian a album hmasa ber 2018-a a tlangzarh hnuah chart lamah a dinhmun a sang chak hle a, hei hian kumin Rising Star chawimawina, rimawi khawvela talent nei Tha, an dinhmun insawhnghet mek te hnena hlan Thin chu a phu le a ni,” tiin an tarlang bawk.
Singer-songwriter Kali Uchis hi record producer a ni bawk a, English leh Spanish hlaah pawh hnuhma a nei Tha tawh hle a, music genre hrang hrang R&B, neo-soul pop leh Latin rhythm-ah te a mikhual lo hle a, a hla hit ‘telepatia’ pawhin stream tluklehdingawn 2 a kai tawh a, tun kum 10 chhunga solo artist kutchhuak Billboard Hot 100 (singles) chart-a Spanish hla lang rei thei ber niin, kar 23 a lang tawh a ni.
Kumin Billboard Latin Women in Music-ah hian chawimawi tur an puan tawh zingah Gloria Estefan chuan Legend award a dawng dawn a, Ana Barbara-i’n Lifetime Achievement awatf, Angela Aguilar-i’n Musical Dynasty leh Kany Garcia ten Spirit of Change te an dawng dawn bawk a ni.