Cyclonic storm ‘Remal‘ in chhiatna thlen nasa

Cyclonic storm ‘Remal’ in West Bengal tuipui kam Kolkata pawh telin a nuai vangin nunphung a khaihlak nasa hle a, mi pahnihin nunna an chan bawk. Cyclone chuan chhiatna a thlen nasa hle a, thingkung te chhem phawngin, chenna in tam tak a tichhe bawk.
Kolkata a Entally area-a cheng Sheikh Sajid kum 51 a upa chu inchung chimin a delhhlum a, kum 80 a upa Renuka Mondal chu a thing tluin an chenna in a delhna lamah a vanduai bawk.
Indian Meteorological Department chuan cyclonic storm Remal chuan a chakna hloh tial tialin a tlahniam zel dawn tiin a sawi.
Cyclone vang hian Kolkata chuan ruahtui darkar 24 chhung lekin 144mm a dawng hman a, chuvang chuan hmun tam takah tui a tling nasa hle. Thingkung 56 a chhem phawng bawk tiin Kolkata Municipal Corporator Mayor Firhad Hakim chuan a sawi a. South Bengal lamah pawh Haldia, Tamluk leh Nimpith te chuan ruahtui an dawng nasa hle bawk.
Khawpui chhunga train services a mumal thei lo va, metro station tam takah tui a tling nasa hle bawk. North Kolkata hmun hniam lam chauh Park Street te pawh tuiin a chim a. Tui tling turu tak chuan State-run hospital leh medical college te pawh a tibuai hle a ni.
Airport pawh darkar 20 dawn khar a ni hial a, mahse, Netaji Subhhas Chandra Bose airport chu hawn a ni zui tawh thung.
Cyclonic storm Remal chuan a chakna a hloh nasa tawh chungin weather office chuan ruahtui nasa takin hmun hrang hrangah a la tla chhunzawm ang tiin an sawi lawk thung.