Congress Thalai-in beisei

Mizoram mipuiin duh taka Lok Sabha MP atana an thlan ZPM candidate Pu Richard Lalhmangaiha an lawmpuiin duhsakna an hlan tih Congress Thalai chuan an sawi a. Ram leh hnam, kan sakhaw tana nghet tak leh dik taka ding tlat turin a beisei tih a sawi.
Congress Thalai Hqrs. thuchhuak chuan, tluang taka Lok Sabha MP inthlan neih a ni leh result puan a nih avangin lawmawm a ti a. Ram leh hnam siam tura rilru fel leh nghet tak pu chunga huaisen taka Congress party aiawha ding Pu Lalbiakzama a chhuang takzet a. Inthlan buaipuitu sawrkar official-te leh MPF, vote chhiar buaipuitu sorkar mi pawimawh leh party mite chungah an lawm tih a sawi.
Kumin Lok Sabha inthlanpuiah India ram pumah Congress party-in MP 99 a nei chu lawmawm a tih thu sawiin, ‘2019 Lok Sabha inthlan aiin seat 47-in kan la hnem zawk a; Aizawl chhung constituency hrang hrang leh veng tam takah 2023 MLA inthlan aia Congress-in vote a leta a hmu tam zawk hian ram pumah Congress party-in sawrkarna a siam leh thuai dawn tih a tichiangah kan ngai,’ a ti.
Manipur-ah Kristiante leh kan Zohnahthlakte nasa taka sawisatu BJP sawrkarnaah Congress-in MP a nei ta vek leh MLA zawng zawng BJP an ni vek chunga Congress-in MP a neihna Nagaland-a thil thleng chu Pathian remruat leh ringtute tawngtaina rahah a ngai tih Congress Thalai hian an sawi bawk.