Saleng Sangma tlinna chhan

Meghalaya-a Tura constituency Lok Sabha poll-ah Congress candidate Saleng Sangma thlan tlin niin Congress te chuan Chief Minister Conrad Sangma kaihhruai NPP kulh an su chim a ni ber.
Saleng Sangma chuan MP ni lai leh NPP candidate Agatha Sangma chu 1,55,241 vote laiin a hneh a.
Meghalaya-ah Congress te chu NPP leh Trinamool hnuaiah pathumna nia ngaih chauh an nih laia Lok Sabha inthlana chakna an chang thei chuan mak tih a hlawh hle.
Inthlan hma candidate puan dawn velah chuan Congress te tan chak ngaihna awm lova ngaih a ni a, Congress te chuan fim takin an elpuite chetlak hun nghakin NPP leh TMC te tihsual an chang a ni ber.
BJP ten inthlana chuh lova NPP te thlawp an tum thu an sawi chian hnuah NPP te chuan Garo region ah MLA 18 lai a neihsa bawk avangin awlsam taka chak tura an inngaihna chu an tisual hle a ni.
Congress te chuan BJP leh NPP thawhhona tak chu chak nan an hman phah ta zawk a ni. “Thingtlang hmun tam takah mipui ten an MLA te chu ngawih chuh tura ngen Congress vote tura thutlukna an siam tawh thu hrilhin. tun inthlan chu NPP duh loh lam ni lovin an thawhpui BJP te duhlohna vang zawk a ni” tiin Phulbari a cheng NPP worker chuan a sawi.
Saleng chu mipui movement tawktarhah a tang ta zawk a, BJP te duhlohna Christian-majority state te chuan an lantirna a ni bawk a, langsar takin BJP te an duhlohna chu huaisen takin an lantir mai a ni.
Chutih laiin CM Conrad Sangma-an mipuite chu Agatha an vote chuan Prime Minister Narendra Modi an vote a ni mai tia ngenna a siam chu engkim titawptu nia ngaih a ni bawk a. NPP mi leh sa te chuan phatsan angah inngaiin an thinrimna chu ballot hmanga lantir an tum ta ber a ni.
Hun a kal a, thil a inthlak danglam chak hle a, Congress rally-ah mi an tam tial tial a, NPP leh TMC rally ah mipui an tlem tial tial bawk. BJP duhlohna chu Congress leh TMC a kal thei ve ve a nih laiin Congress ten hlawkna an tel ta zawk nia ngaih a ni.
NPP te chu dinhmun khirh takah an ding zui a, kawng khatah BJP te chu an thing thla thei ngawt si lo, kawng leh lamah BJP te nena an inzawm zui zel chuan mipui ten an thinhrik zui zel dawn tih a chiang bawk si.
Kum khat hnu velah MDC inthlan a awm dawna chutah chuan NPP te chu mipui ten an ngaihdam leh damloh a hriat ang a, chona nasa ber tur chu kum 2028 Assembly election a ni thung ang a, chumi hma chuan Congress te chu indin tha hman fe tura ngaih an ni thung.
Meghalaya mipui te chuan Kristian tana hlauhawmah BJP te chu ngaiin BJP te nena thawhdunna nei te chu an duhlohna an lantir mai a ni.